Ich^a) Johans Hilwer der mêtzger burger ze sant Gallen tun kûnt vnd vergich offenlich mit disem brieue fur mich vnd fur alle min êrben allen, die in sehent lesent oder horent leLsen, daz ich mit guter vorbetrachtûng vnd mit wolbedâchtem mute von miner êhafter note wegen recht vnd rêdlich verkofft han acht schilling phenning guter Costenzer L munse jarlichs vnd êwigs geltes vnd zins ab minem vnd vsser minem hus hofstatt vnd hofraiti gelegen ze sant Gallen in der vorstatt vor Irer Tor¹ zwischen CunLratz Kochlers garten vnd Nycolaus von Burren² hus vnd hofraiti vnd von allen sinen zugehorden vnd aines staten êwigen koffes recht vnd rêdlich ze koffen geben han dem êrbern wolbeschaidenn Johansen Landen och burger ze sant Gallen vnd sinen êrben vmb achtenthalb phûnt pfenning ie zwen gut geng haller fur ainen Costenzer phenning, die ich von im dâr vmb enphangen han vnd ir gantzlich von im gewert bin worden vnd an minen offenn nûtz bewêndet sint, daz selb min hus vnd hofraiti min lêhen ist von dem êrwirdigen gotzhus ze sant Gallen, dannen ich och dem obgenanten Johansen Landen die vorgeschribenn acht schilling phenning jarlichs vnd êwigs geltes vnd zins ab dem vnd vsser dem ietzgedâchten minem hus vnd hofraiti vnd von allen sinen zugehorden willeklich vnd ledeklich von minen handen zu sinen handen vfgeben vnd geuêrtigot han mit allen den worten vnd getaten, wie recht sitte vnd gewonhait waz, daz es kraft vnd maht hât vnd gehan mag ietz vnd hie nâch, mit dem gedinge vnd in den rechten, daz ich vnd alle min êrben vnd nâchkomen, in deren hand ald gewalt daz vorgeschribenn min hus vnd hofraiti iemer kûmpt ald ist oder habent ald niessent, dem obgenanten Johansen Landen vnd sinen êrben iemer mêr êweklich aller jarlich ie ze sant Gallen tag acht schilling phenning der vorgeschribenn munse ab dem vnd vsser dem vorgeschribenn minem hus vnd hofraiti vnd von allen sinen zugehorden ze rechtem jarlichem zins ân furzug ân allen abgang ân alle minrûnge vnd ân allen iro schaden geben richten vnd antwurten sullent vnd wollent ze sant Gallen in der statt ân alle widerrêde ân gefarde. Vnd dâr vmb so han ich mich frylich vnd willeklich entzigen von minen vnd vsser minen handen in dez vnd zu dez obgenanten Johansen Landen handen vnd verzich mich mit disem brieue gantzlich vnd gar fur mich vnd fur alle min êrben aller aigenschaift aller lehenschaft aller kûntschaft aller rechtung aller gewêr lute vnd brieue aller recht vordrûngen vnd ansprâchen gaistlichs vnd weltlichs gerichtes, so ich ald min êrben an den vnd zu den vorgeschribenn acht schilling phenning jarlichs vnd êwigs geltes vnd zins ab dem vnd vsser dem vorgeschribenn minem hus vnd hofraiti ie gehebt hant ald hie nâch iemer mêr gehaben oder gewunnen mochtint, vnd daz ich noch min êrben noch niemant andre an vnser statt noch von vnsern wegen den obgenanten Johansen Landen noch sin êrben an den noch von der vorgeschribenn acht schilling phenning wegen jarlich vnd êwigs geltes vnd zins ab dem vnd vsser dem vorgeschribenn hus vnd hofraiti niemer mêr sullent noch wollent sûmen noch ierren ansprechen vftriben bekumberren bekrenken noch in dehain wise beswaren weder mit gaistlichem noch mit weltlichem gerichte noch ân recht noch mit dehainen andern sachen ân gefarde. Ich han och gelobt bi miner truwe vnd loben mit disem brieue fur mich vnd fur alle min êrben, dez vorgeschribenn jarlichen vnd êwiges geltes vnd zins ab dem vnd vsser dem vorgeschribenn minem hus vnd hofraiti vnd von allen sinen zugehorden vnd och dez koffes recht wer ze sinne nâch recht vnd den obgenanten Johansen Landen nâch dem rechten dâr vmb ze versprechenn vnd ze verstanne ân allen sinen schaden ân gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so han ich vorgenempter Johans Hilwer min insigel fur mich vnd min erben offenlich an disen brief gehenket. Der geben wart ze sant Gallen in dem jâre, do von Cristi geburt wârent druzehenhûndert jâr, nunzig jâr vnd dâr nâch in dem andern jâr, an sant Franciscen tag im mayen.