Ich^a) Cunrat von Ainwille hern Cunratz saligen von Ainwille¹ ritters wilunt êlicher sûn tun kûnt vnd vergich offenlich L mit disem brieue fur mich vnd fur alle min êrben allen, die in sehent lesent oder horent lesen, daz ich disu L nâchgeschribenn menschen Margarethen Hayminen Otten Haymen saligen wilent êlichen tochter Wilhelms L Klain Haintzen von Vlme² êlichen wirtinnen vnd Rudolfen irn êlichen sûn, die von den liben min aigen gewesen sint vnd belehent von dem êrwirdigen gotzhus ze sant Gallen vnd sich mit liben vnd mit allen irn gutern vnd zugehorden von mir an daz ietzgedâcht gotzhus ze sant Gallen gekofft hant, frylich vnd lêdeklich mit liben vnd mit allen irn gutern vnd zugehorden bi disem nâchgenempten botten an dez hohwirdigen fursten mines genadigen herren abt Cunen³ hand abt dez êgedâchten gotzhus ze sant Gallen vnd an daz selbe gotzhus von miner hand vfgesendet han recht vnd rêdlich, vnd sende su vf mit disem brieue bi Cunraten von Burron⁴ dem weber burger ze sant Gallen an dez obgedâchten mines genadigen herren abt Cunen hand vnd an daz vorgeschriben gotzhus ze sant Gallen, also daz die obgenanten Margareth Haymin vnd Rudolf ir êlicher sun mit liben vnd mit allen irn gutern vnd zugehorden vnd allu die kind, die von inen koment ald geborn werdent, nû hinnenhin iemer mêr an daz vorgeschriben gotzhus ze sant Gallen gehorent vnd gehoren sont vnd dez aigen sint vnd sin sont. Vnd ze offenem waren vrkunde vnd stater sicherhait aller dirre vorgeschriben dinge vnd gedinge so han ich Cunrat von Ainwille da vor genempt min insigel offenlich an disen brief gehenkt. Der geben wart ze sant Gallen in dem jâre, do von Cristi geburt warent druzehenhûndert nunzig jâr vnd dâr nâch in dem andern jâre, an sant Felix tag dez hailigen bâbstes ze mittem mayen.