Wir^a) diz nachgenemten Vrsel Kasslerin Hansen von Haidelbergs L elichen husfrow vnd Albreht von Haidelberg veriehent offenlich L mit disem brief, ist daz ez ze schulden kompt, daz der pfantschilling L ze Singenberg Hansen von Haidelbergs tail vellet an mich obgenanten Vrsellen oder an mich obgenanten Albrehten vnd an min erben, so sollent wir der losung statten vnd gnug tun dem erwirdigen vnserm gnadigen herren abt Cun dez gotzhus ze sant Gallen vnd sinen nachkomen vnd dem vorgenanten gotzhus ze sant Gallen, alz digg sy an vns gefordret wirt. Vnd dez ze vrkund, won ich obgenanti Vrsel aigens insigels nit han, so han ich erbetten Hansen von Haidelberg min elichen man, dz er sin aigen insigel fur mich offenlich gehenkt hat an disen brief, vnd ze vrkund so han ich obgenanter Albreht von Haidelberg fur mich vnd min erben min aigen insigel offenlich gehenkt an disen brief. Geben ze Wil¹ an dem nahsten zinstag nach sant Gallen tag in dem iar, do man zalt von Cristi geburt tusent druhundert nunzig vnd zway iar.