Allen^a) den, die disen brief ansehent oder horent lesen, kund ich Elz von Zwingenstain¹ wilent korfrowe vnser frôwen gotzhus ze Lindow² vnd vergich L offenlich mit disem brief, daz ich mit guter vorbetrachtung vnd mit wolbedachtem sinne vnd mut mit rat gunst vnd willen miner frunde L gesund libs vnd mutes an dem tag, alz dirre brief gegeben ist, ze Lindow in dem vorgenanten gotzhus vnd da in der merren stuben vor L miner gnedigen frowen fro Claren abtissenn³ dez obgenanten gotzhus ze prim zit selber mit minem aigenn libe mit den nachbenempten zugen gewesen bin vor der vorgenanten miner frôwen der abtissenn vnd allem capitel dez selben obgenanten gotzhus, daz och da hierumb gesamnot waz, vnd bat da die vorgenant min frowen vnd daz capitel gnadklich, daz si mir vrlob gabint vnd mir erloubtind vss dem vorgenanten gotzhus ze varent vnd anderswa ze sinde vnd got ze dienent, won ich in dem dikbenempten gotzhus vnd closter fridlich vnd mit guter gewissni nit furo kund noch mochti sin noch beliben, vnd och von andren redlichen sachen, die war sint vnd kuntlich, vnd weri, daz si min bett hierumb erhortind, so welt ich inen min pfrund, die ich in dem vorgenanten closter hett, ledklich vfgeben, da erhort min bett die vorgenant min gnedig frow die abtissenn vnd daz capitel vnd gaben mir gantz vrlob, vsser dem vorgenanten gotzhus ze varent, won si min sachen, darumb ich es tun wolt, redlichen dunhten, vnd anderswa, wa ich welt oder mochti, in got ze sin vnd ze wandlin, vnd also gab ich do mit allen den worten werken vnd getaten, so darzu hort von recht oder von gewonhait, die vorgenante pfrunde vnd alles recht gaistlichs vnd weltlichs, so ich han hett oder ie gewan in dem vorgedachten gotzhus vnd closter, frylich ledklich vnd gentzlich vff mit allen rechten vnd gewonhaiten vor den nachbenempten zugen in der vorgenanten miner frôwen der abtissenn hant, die si och vfnam fur sich vnd allez capitel, vnd darnach swur ich do ainen gelerten aide liplich mit vfgebotnen vingern ze den hailgen da selbs vor der obgenanten miner gnedigen frôwen vnd vor dem capitel, daz ich die vorgedachten pfrund noch dekain recht, so ich in dem vorgenanten gotzhus han het oder ie gewan ald ie gehett, hinnenhin niemer angesprechen wil noch sol weder mit gaistlichem noch mit weltlichem gericht noch âne gericht kains wegs suss noch so haimlich noch offenlich noch nieman von minen wegen. Vnd dez allez ze offem vnd warem vrkund vnd stater ewiger sicherhait han ich obgenantu Elz von Zwingenstain disen brief daruber geuestnot vnd besigelt mit minem aigenn angehenkten insigel vnd han och gebetten dis nachbenempten zugen, die bi allen vorgescriben dingen gewesen sint vnd die gesehen vnd gehort hant, hern Vlrich den Burgower⁴ korherren ze Cur vnd kircherren ze Gossôw⁵, herr Niclausen Solbach capplan ze dem spitale ze Lindow, Endres Zendring, Clausen Siggen, Petern den Muder, Gerwig den Payger burger ze sant Gallen, herr Cunrat Hurling kircherren ze Bertschantruti⁶, Hansen den Zan vnd Rufen den Kas alle vnd ieglichen besunder, daz si diser sachen ingedenk werin vnd zugen, vnd weli vnder in aignu insigel hettind, daz die von miner bet wegen iru insigel ze zugnuzz zu minem insigel an disen brief offenlich hanktind, vnd sunderlich Gerwig den Payger burger ze sant Gallen, der in allen vorgeschriben sachen bi mir waz vnd stund vnd ich es och alles sament mit sinem willen gunst vnd verhengd hilf vnd rat getan vnd vollebrauht han. Wir die obgenanten zugen, die insigel hant, Vlrich Burgower korherre ze Cur vnd kircherre ze Gossow, Niclaus Solbach capplan ze dem vorgenanten spital, Endres Zendring, Claus Sigg vnd Peter Muder veriehin, daz wir bi allen vorgeschriben dingen gewesen sint vnd die gesehen vnd gehort hant. Dez ze vrkund habin wir vnsru insigel ze ainer ziugknuzz von ernstlicher bett wegen der obgenanten Elzen von Zwingenstain och zu ir insigel gehenkt an disen brief vns selb âne schaden, sunderlich vergich ich obgenanter Gerwig Payger burger ze sant Gallen, daz ich in allen vorgeschriben sachen gewesen bin bi der obgenanten Elzen von Zwingenstain vnd daz si ez alles mit minem willen vnd gunst vnd hilf vnd rat getan vnd vollefurt hat, alz vorbeschaiden ist. Vnd dez ze vrkund der warhait han ich min aigen insigel ze ainer zugknuzz vnd vestnung aller vorgeschribner sach och gehenkt an disen brief. Der geben ward ze Lindow nach Cristus geburt druzehenhundert iar, darnach in dem zwai vnd nuntzigosten iar, an dem nunden tag dez andern herbstmanotz.