Wir^a) diz nâchgenempten Nycolaus Rupreht, Vlrich Rudger vnd Johans Eberlis phleger vnd maister der siechen dez spittâls ze sant Gallen¹ tugint kûnt vnd veriehent offenlich mit disem brieue L fur vns vnd fur alle vnser nâchkomen allen, die in sehent lesent oder horent lesen, daz wir ainbarklich mit wolbedâchtem mute dem beschaidenn knecht Johansen Zipperlin von Roggwille² Wêrlis L Zipperlis êlichen sûn, den man nemmet Hansen Ayer sûn, das gute, daz man nemmet an der Hub³ ze Roggwille gelegen vnd ainhalb stosset an die strâsse, die dâ gât gen Lankwatte⁴, anderthalb an L den wingarten, den man nemmet dez von Bonstetten wingarten an der Hub, vnd ze der dritten syten an den hof, den der Loffler von dem vorgenanten spittâl bûwt, daz dez selben spittâls recht aigen ist, mit hus mit hof mit grûnd mit grât mit wasen mit zwi mit wûnn mit waiden mit holtz mit veld mit stegen mit wegen mit gengen mit strassen mit wasser mit wasserflussen mit allen rechten nutzen vnd gewonhaiten vnd mit allen zugehorden recht vnd rêdlich verlihen habent im vnd allen sinen êrben frowen alz mannen tochtern alz knaben, allain vsgenomen aigen luten, die iemans aigen von den liben anders warint, denn daz su gotzhus lute warint, ze ainem staten êrbzinslehen vmb ainen staten zins mit samlicher beschaidenhait vnd in den rechten dinge vnd gedinge, daz er vnd alle sin êrben daz selbe vorgenante gute mit aller zugehorde in guten êren vnd vnwustlich haben niessen besêtzen entsêtzen vnd bûwen sont, vnd sullent demselben vorgenanten spittâl dâr von aller jarlich ie ze sant Martins tag ain phûnt phenning guter vnd genger Costentzer munse funf mut gutes vnd vngefârlichs kernen zwai malter gutes vnd vngefârlichs habern alles sant Galler messes funf hunr vnd funfzig aiger ze rechtem jarlichen zins ân furzug ân allen angang^b) ân alle minrunge vnd ân alle widerrêde geben richten vnd antwurten ze sant Gallen in der statt ân allen dez selben spittâls vnd siner phleger schaden ân gefarde. Vnd habent och dem selben spittâl ze êrschatz dâr vmb enphangen sechzehen phûnt phenning guter Costenzer munse, die wir an dez selben spittâls offenn nûtz bewendet hant. Welhes jâres aber der obgenant Johans Zipperli oder sin êrben dem egedâchten spittâl den vorgeschribenn zins nut richtint vnd gabint gantzlich vnd gar ze den ziln vnd in den rechten, alz vor geschriben stât, vnd sich daz alz vil alz dik vnd alz lang verzug, daz zwen zins den dritten erlangitint vnd begriffint oder erlanget vnd begriffen hettint, so ist vnd sol daz selb vorgenante gute, daz man nemmet an der Hub, mit aller zugehorde dem vorgeschribenn spittâl zinsfellig vnd gantzlich vnd gar ledig vnd los sin vnd haissen vnd dannenhin von aller manglichen iemer mêr êweklich vnansprachig vnd vnbekumbert beliben ân alle gefarde. Wir haben och dem obgenanten Johansen Zipperlin vnd sinen êrben daz vorgeschriben gute verlihen in den rechten vnd mit dem geding, ware daz su daz selb gute mit dehainer ald an dehainer siner zugehorde wustlicher vnd anders hettint ald hieltint vnd nut in samlichen êren, alz wir soltint oder landes recht ist, waz denn andern burgern ze sant Gallen recht ist vmb êrbzinslêhen, daz sol och dem vorgenanten spittâl behalten sin vnd sollent och der obgenant Johans Zipperli vnd sin êrben dem selben och genug tun vnd ân alle widerrêde gehorsam sin ân gefarde. Ez ist och bedingot vnd berêdt worden, ware daz der obgenant Johans Zipperli oder sin êrben dehaines jares von iro rechten dez vorgenanten gutes vnd êrbzinslêhens gân vnd die verkoffen woltint, so sullen su dez egedachten spittâls phlegern, wer die warint, die selben iru recht dez êrsten vail bieten vnd vor manglichem ze koffenn geben funf schilling phenning Costenzer munse naher vnd baz denn iemant andre, ob su sie koffen wollent, war aber daz su sie nut koffen woltint ald mochtint, so mûgent er vnd sin êrben die selben vorgeschribenn iru recht dez egedachten gutes vnd êrbzinslêhens wôl ze koffenn geben, wem su wollent, daz gotzhus lute sint vnd nut denen die aigen sint, dem vorgeschribenn spittâl an sinen rechten gantzlich vnschadlich, vnd wem och er oder sin êrben die selben vorgeschribenn iru recht ze koffenn gebent, dem sullent ez dez obgedachten spittâls phleger, wer die sint, ân allen furzug vnd widerrêde lihen vmb den zins vnd in den rechten, alz an disem brieue geschriben stât, vsgenomen aigenen luten, alz vor beschaiden ist. War aber daz dez selben obgedachten spittâls phleger, wer die warint, von dez selben spittâls rechten dez êgedâchten gutes gân vnd die verkoffen woltint, so sullen su dem obgenanten Johansen Zipperlin vnd sinen êrben die selben recht dez obgedâchten gutes dez êrsten vail bieten vnd vor manglichen ze koffenn geben och funf schilling phenning Costenzer munse naher vnd baz denn iemant andre, ob su sie koffen wollent, war aber daz er oder sin erben die selben vorgenanten recht dez egedâchten gutes nut koffen woltint ald mochtint, so mûgent doch denn dez selben spittâls phleger, wer die sint, dez selben obgedâchten spittâls recht dez vorgeschribenn gutes vnd êrbzinslêhens wol ze koffenn geben, wem su wollent, doch dem obgenanten Johansen Zipperlin an sinen rechten dez selben gutes vnd êrbzinslêhens gâr vnd gantzlich vnschadlich. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so haben wir vorgenempten Nycolaus Rupreht, Vlrich Rudger vnd Johans Eberlis phleger vnd maister dez obgedâchten spittâls alle drij vnsru vnd dez selben ietzgedâchten spittâls insigel fur vns vnd vnser nâchkomen offenlich an disen brief gehenket. Der geben wart ze sant Gallen in dem jâre, do von Cristi geburt wârent druzehenhûndert jâr, nunzig jâr vnd dâr nâch in dem andern jâre an sant Othmars abent.