Wir Cun von gottez gnaden abt dez gotzhus ze sant Gallen¹, daz an allez mittel zugehort L dem stul ze Rom, veriehent mit vrkund diz briefs, dz vns der alt Eberhart von Sax² ain offen brief L sand, der mit sinem insigel besigelt wz, vnd an dem selben brief vns vff sand an vnser hand L den wingarten, den er willent koft vmb den halbriter her Rudolfen von Amptz³ saligen in dem Rintal gelegen, won er von siner krankhait sins libs nit fur vns komen moht, der selb wingart och sin lehen gewessen war von vns vnd vnserm vorgenanten gotzhus ze sant Gallen, vnd batt vns an dem vnd mit dem selben brief, dz wir im gnad datti vnd gundi dem fromen vesten her Vlrichen von Amptz⁴ riter sinem lieben ohen vnd guten frund vnd sinen erben den vorgenanten wingarten zu dez selben her Vlrichs vnd siner erben handen ze bringen in rehtz gemahtz wis, dar vmb erhorten wir do sin bett vnd lihent vnd sendent dem egenanten her Vlrichen vnd sinen erben den vorgenanten wingarten in rehtz gemahtz wis mit disem brief vns vnd vnserm vorgenanten gotzhus ze sant Gallen an allen vnsern rehten vnd gewonhaiten gentzlich vnschadlich, vnd ist diz beschehen vnd redlich volfurt, alz ez billich kraft vnd maht haben sol vnd mag ietz vnd hienach. Vnd dez ze vrkund habent wir abt Cun der obgenant vnser insigel offenlich gehenkt an disen brief. Dar nach vergich ich Eberhart von Sax der alt, dz allez dz war ist, so der hohwirdig furst min gnadiger herr abt Cun dez gotzhus ze sant Gallen von dez obgenanten wingarten vnd vff gebens vnd vff sendens wegen von mir veriehen vnd verschriben hat, vnd ze merer sicherhait so han ich och min aigen insigel offenlich gehenkt an disen brief. Geben ze Wil⁵ in vnsers^a) statt an dem nahsten sunnentag vor sant Katherinen tag in dem iar, do man zalt von Cristi geburt tusent druhundert nunzig vnd zway jar.