Ich Egloff von Altsteten der alt¹ vergich offenlich mit vrkund diz briefs fur mich vnd all min erben allen den, die L disen brief an sehent lesen oder horrent lesen, daz diz nahgenempten erber lut Elsbett Hansen Zimermans saligen von L Altsteten elichen tohter Hansen Bongarters elichi wirtin, Johansen, Rudolffen vnd Hainrichen derselben Elsbetten elichen L sun, die min reht aigen gewessen sint, sich selber mit lip vnd mit gut vnd mit allen rehten vnd ansprachen, die ich zu iren lip vnd zu iren gut hatt ald haben moht, von mir reht vnd redlich gekoft hand an daz erwirdig gotzhus ze sant Gallen, dannan sy och min lehen gewessen sint, vmb sehszehen pfunt pfennig Costentzzer muns, der ich gantzlich vnd gar von inen gewert bin vnd enpfangen han vnd an minen offen nûtz bewent, die selben lut Elsbett, Johans, Rudolff vnd Hainrich ir elichen sun han ich mit lîp vnd mit gut vnd mit allen rehten reht vnd redlich vff geben vnd gevertgot zu dez erwirdigen minez gnadigen herren Cun von gottez gnaden abt dez gotzhus ze sant Gallen² vnd zu dez selben sines gotzhus handen braht, wie reht sitt vnd gewonlich was vnd alz ez kraft vnd maht haben sol vnd mag ietz vnd hie nach, mit der beschaidenhait, daz die selben Elsbett, Johans, Rudolff vnd Hainrich der selben Elsbetten elichen sun mit lip vnd mit gut vnd mit allen rehten nû hinen hin vnd iemer me owenklich an daz obgenant gotzhus ze sant Gallen gehorrent vnd dez reht aigen sin sond vnd anders nieman vber ir Elsbetten, Johansen, Rudolffen vnd Hainrichen noch ir nahkomen lip noch gut vogt noch herr sin sol denn allain daz gotzhus ze sant Gallen, vnd dar vmb so han ich mich willenklich enzigen vnd enzih mich mit disem brief gantzlich vnd gar fur mich vnd all min erben der obgenanten Elsbetten, Johansen, Rudolffen vnd Hainrichen mit lip vnd mit gut vnd mit allen rehten aller aigenschafft aller manschafft aller lehenschaft aller kuntschaft aller gewer lut vnd brief allez gaistlichen vnd weltlichen rehtez aller vordrung vnd ansprach aller reht vnd rehtung, so ich ald min erben an den vnd zu den obgenanten Elsbetten Johansen Rudolffen vnd Hainrichen ir lip vnd ir^a) gut ie gehept hand ald hie nah iemer gehaben oder noch gewinnen mohtin, vnd daz ich noch enkain min erb noch nieman andern an miner statt noch von minen vnd miner erben wegen die obgenanten minen gnadigen herren abt Cun noch enkain sin nahkomen vnd daz vorgenant gotzhus ze sant Gallen oder die obgenanten Elsbetten, Johansen, Rudolffen vnd Hainrichen ir lip noch ir gut niemer me sollent an sprechen vff triben bekumbren noch enkain wis beswaren weder mit gaistlichem noch mit weltlichem geriht noch an reht noch mit enkainer lay ander sach an all gewerd. Ich han och gelopt mit miner truw vnd loban mit disem brief fur mich vnd all min erben, der obgenanten Elsbetten, Johansen, Rudolffen vnd Hainrichen vnd och dez koffs reht wer ze sint nach dem rehten gen aller menklichem vnd fur aller menklichs ansprechen gaistlicher vnd weltlicher lut vnd gerihtez an allen stetten, do dez die obgenanten min gnadiger herr abt Cun vnd sin nahkomen vnd daz gotzhus ze sant Gallen vnd och die lut Elsbett, Johans, Rudolff vnd Hainrich bedurfent vnd notdurftig sint vnd alz dik ez ze schulden kumpt. Vnd dez ze vrkund so han ich min aigen insigel fur mich vnd min erben offenlich gehenkt an disen brief, dar nach vergich ich Eglolff von Altsteten³ dez obgenanten Eglolff von Altsteten elicher sun, daz allez, daz min obgenanter vatter von der obgenanter lut Elsbett, Johans, Rudolff vnd Hainrichs wegen mit lip vnd mit gut mit verkoffen vnd vff geben vnd vertgens wegen gen dem obgenanten gotzhus ze sant Gallen getan hat, daz dz allez mit minem willen gunst vnd wissen beschahen ist vnd dz ich noch dehain min erb da wider iemer me tun noch reden sollent in dehainen weg weder mit reht oder an reht, vnd daz diser vorgenant koff vertgen von mir vnd minen erben ietz vnd hienach stat vnd vnwanderbar belib, so han ich och min aigen insigel fur mich vnd min erben offenlich gehenkt an disen brief ze merer sicherhait. Geben an dem nahsten donrstag nach sant Mathyes tag in dem iar, do man zalt von Cristi geburt tusent druhundert nunzig vnd in dem drytten jar.