Wir^a) die nachgenemten Beringer Schlihting vnd Johans Rainhart baid burger ze sant Gallen tun kunt vnd veriehent offenlich mit disem brief allen, L die in ansehent lesent oder horent lesen, daz wir baid mit wolbedahtem mut willeklich frilich vnd vnbetwungenlich offenlich gesworn haben ietwedre L besunder ainen gelerten aide liplich ze got vnd ze den hailigen mit vf gehabenen vingern, war daz wir baid gemainlich oder dewedre vnder vns besunder L dehainer lay stoss sach oder ansprachen, ez sie vmb brief oder vmb ander sachen, vff disen huttigen tag, alz dirre brief ist geben, hettint oder hinnenhin iemer gewunnint zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz burger ald si werdent noch burger da selbs, wenne vnd alz dik daz beschach vnd woltin wir ie danne darumb rehtes nut enbern, das wir danne ie darumb rehtes phlegen vnd reht von in nemen sullen vnd wellen ze sant Gallen in der stat vor irem geriht vnd niendort anderswa nach der selben stat reht vnd gewonhait, es war danne, daz wir baid gemainlich oder ainer vnder vns da selbs rehtlos gelassen wurdint vnd daz och daz da kuntlich wurdi, so ist vnser ietwedrem behalten vnd in dem aide vss gelassen, daz och der selb vnder vns ie danne, von dem er rehtlos gelassen ist, anderswa reht suchen sullen vnd mugent, da ez danne billich vnd muglich ist, ân alle geuarde. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so haben wir die vorgenanten Beringer Schlihting vnd Johans Rainhart baid vnseru aigenu insigel offenlich gehenkt an disen brief. Der geben ist ze sant Gallen an dem nahsten donstag nach sant Gregorien tag in dem jâr, do von Cristus geburt warent druzehenhundert jâr, nunzig jar vnd darnach in dem dritten jare.