Wir Leupold¹ etc. tun kunt vmb die zwai tausend gulden, die vns vnsser lieben oheim graf Haug von Monntfortt herr zu Bregentz², graf Hainrich von Werdenberg herr zu Vadutz³, graff Albrecht von Werdenberg ze Pludentz⁴ vnd graff Diethelm von Tochkenburg⁵ durch vnssrer fleissige pete vns ze dienst mitsambt andern mitburgen aufbracht vnd entlehnt habent von vnserem getrewen lieben Vlreichenn vom Emptz⁶ vnserm vogt ze Veltkilch⁷, darumb wir von dem edlen vnserm lieben oheim graf Hannssen von Werdenberg herren zu Sandggans⁸ vnser veste Neydperg⁹ vnd Maylss¹⁰ mit irer zugehorung gelost haben, die er ingenomen solt haben zu sand Jorigen tag schierist kunftigen, das wir darumb fur die hochgeboren fursten vnsern lieben herren vnd vettern hertzog Albrecht¹¹, vnser lieber bruder vnd vns vnd vnser erben den obgenanten vnsern lieben oheymen geloben vnd verhaissen vnd geloben pey vnsern furstlichen wirdichait, das wir sy oder ir erbenn von der obgenanten geltschuld gen dem egenanten von Emptz oder seinen erben ledigen vnd bringen sullen an all ir schadenn von sand Jorigen tag, der schierist kumbt, vber ain gantz jar vngeuerlich. Taten wir des nicht, was sy des dann furbazzer schaden nement, wie die genant weren, den sullen wir in gantzlich ablegen vnd widerkeren vnd sullen sy das haben auf vns vnd allem vnserm gut, wie das genant ist, an geuerde. Mit vrchunt ditz briefs. Geben ze Veltkilch an phintztag in der osterwochenn LXXXXIII^o.