Wir^a) ffrow Clement grafenn von Tokkenburg¹ wilent her Hainrichs salgen herren ze Hewen elichi wirtenn, L Peter herr ze Hewen ritter vnd Wolfli och herr ze Hewen² gebruder ir vnd des ietzgenanten her Hainrichs salgen elich L sun veriehen vnd tunt kund allermenglichem mit disem brief fur vns vnd alle vnser erben, daz wir allu dru gemaLinlich vnd vnuerschaidenlich wissentklich vnd mit wolbedahtem mut von vnser kumberhaftin wegen redlich vnd recht fur vns vnd fur alle vnser erben verkoft haben ainen hof ze Lutmarikon³ gelegen, der wilent Bertschis salgen von Lutmarikon was, mit hus mit hof mit hofstetten mit hofraiti mit garten mit bunden mit akker mit wisen mit holtz mit veld mit wunn mit waiden mit wasser mit wasserflussen mit runsen mit vssgengen mit ingengen mit stegen mit bruggen mit wegen mit grund vnd mit grat vnd mit allen rechten nutzen zinsen gewonhaiten vnd mit allem dem, so zu ald in denselben hof von recht ald von gewonhait iendert gehort, benemptem ald vnbenemptem besuchtem ald vnbesuhtem, es sye ob erd ald vnder erd, es sye ietz funden ald es werd hienach funden, derselb hof vnser lehen was von dem erwirdigen gotzhus in der Richen Ow⁴, vnd haben denselben hof mit allen ietzgenanten rechten vnd mit aller zugehord ains vngeuarlichen ewigen kofs ze koffent geben dem erbern man Rudolfen Ruggen sesshaft ze Ohsenhart⁵ vnd allen sinen erben vmb ahtzig pfund vnd vmb aht pfund vnd vmb zehen schilling alles guter vnd genamer Italiger alter haller, dero wir och aller gantzlich vnd gar nach vnserm willen von im bezalt syen an den stetten, da wir vnsern grossen wahsenden vnlidigen schaden mit verkomen vnd gewendet haben, vnd haben im denselben hof ze Lutmarikon mit allen vorgenanten rechten vnd mit aller zugehord zu sinen vnd zu siner erben handen braht vnd geuertgot mit des erwirdigen fursten vnsers gnadigen herren abt Wernhers von gottes gnaden des gotzhus in der Richen Ow⁶ hand vnd in des in liblich nutzlich gewer gesetzt, alz recht sitt vnd gewonlich was vnd alz es billich kraft vnd maht hat vnd haben sol nu vnd hienach. Vnd wan wir disen kof also redlich getan vnd volfurt haben, so haben wir allu dru wilklich vnd wolbedaht fur vns vnd fur alle vnser erben vnd nachkomen gegen dem obgenanten Rudolf Ruggen vnd geben allen sinen erben ledklich vnd ffrilich verzigen vnd entwert vnd verzihen vnd entweren vns redlich vnd recht mit disem brief an dem obgenanten hof aller aigenschaft aller lehenschaft aller manschaft aller gewer aller kuntschaft aller zugnust lut vnd briefen, so wir ietzo hant ald so wir ald ieman andra von desselben hofs wegen hienach vindent, alles rechten gaistlichs vnd weltlichs gerichts aller rechtung vordrung vnd ansprachen alles furzugs vnd vsszugs vnd aller andren sachen vnd geuarden, dar mit wir ald vnser erben ald vnser dehaines besunder ald ieman andra von vnsern wegen den obgenanten hof mit allen obgenanten rechten vnd mit aller zugehord gantzlich ald an dehainem tail iemer mer kundent ald mohtent angesprechen ald dar mit wir wider dehainu ding stuk ald artikel, so hie uor vnd hienach an disem brief geschriben stant, iemer mer kundent ald mohtent gereden ald getun ald schaffen getan mit dem rechten ald an recht ald in dehain wis, so ieman erdenken^b), an geuard. Wir sollent vnd gelobent och allu dru gemainlich vnd vnuerschaidenlich bi guten truwen fur vns vnd fur alle vnser erben, die wir och vesteklich her zu bindent, des obgenanten hofes ze Lutmarikon gelegen mit allen vorgeschribnen rechten vnd mit aller zugehord vnd dis redlichen koffes in aller vorgeschribnen wis des obgenanten Rudolf Ruggen vnd aller siner erben gen allermenglichem vff gaistlichen vnd vff weltlichen gerichten allenthalben, wenn wa ald wie dik si des noturftig sint ald dar vmb mit dem rechten von ieman vffgetriben ald angesprochen werdent, recht wern ze sint nach dem rechten vnd nach des landes sitten vnd gewonhait vnd si allweg dar vmb ze uerstend vnd ze uersprechent vnd von der ansprach in vnserm kosten an allen iren schaden an widerred ze entrihent vnd ze ledgent an geuard. Vnd des alles ze stater sicherhait vnd offner warhait so haben wir obgenanten frow Clement grafenn von Tokkenburg, Peter ritter vnd Wolfli herren ze Hewen allu dru vnsru insigel fur vns vnd fur alle vnser erben offenlich gehenkt an disen brief. Der geben ist ze Enggi⁷ in vnser statt an dem nahsten fritag nach sant Walpurgs^c) tag ze ingendem maiien, do man zalt von Cristus geburt druzehenhundert vnd nuntzig jar, dar nach in dem dritten jar.