Dem erwirdigen minem gnadigen herren abbt Cunen abbt des gotzhus ze sant Gallen¹. Min getruw willig dienst sig vwern gnaden allzit berait vnd vorgeschriben. Erwirdiger L vnd gnadiger herr, als vwren gnaden wol ze wissent ist, das mich min vettern geuangen L hattent vnd mir entwert hattent min vesti lut vnd gut, nv hând su mir in L miner vesti nichtzit gelaipt vnd mir darvsz gefurt minen win min korn min harnasch minu armbrost min phenning min flaisch min schmaltz min kas vnd allen minen husrât, was ich in minem hus gehept hân, es sig klain oder grôß, vnd ettlich min brief. Nv musz ich mich selber angryffen mit versetzen vnd mit verkôffen, das ich min hus wider berust nâch minr vnd der vesti notdurfft, tun ich vwren gnâden ze wissent, das ich ze kôffent geben hân minen lieben ohemen von Amptz² dem alten hern Vlrichen, hern Markwarten, Vlrichen, Brunen vnd Goszwin sinen sunn vnd och^a) dem jungen hern Vlrichen vnd Rudolffen sinem bruder her Eglolffs saligen sunn von Amptz, vnd darzu Hansen von Amptz wylent des jungen her Vlrichs saligen sun, alle die wingarten, die ich ze Rebstain³ in dem Rintal ligent hân, mit allen irn zugehorungen benempten vnd vnbenempten, vssgenomen den wingarten, den ich vor ziten gekôfft hân von hern Rudolffen von Amptz, den man nampt der halbritter, als ich den mit aller siner zugehord dem obgenanten minem ohem hern Vlr. dem alten von Amptz vnd sinen kinden vor ger(icht) gemacht vnd och mit vwren handen vnd genaden gevertget han, vnd och vssgenomen den wingarten, den man nempt der Englaberg. Genadiger herr, wân nv die andern min^b) wingarten ze Rebstain, die ich disen^c) vorgenanten von Amptz ze koffent geben hân, recht lehen sint von vch vnd vwerm gotzhus ze sant Gallen vnd ich mit min selbs lib zu vwren gnâden ietz nit wol geriten mag, das ich vch du lehen vffgeb, darumb so send ich vch disen offenn besigelten brief mit minem aigenn insigel an miner statt vnd gib vch die selben min wingarten da mit vff an vwer hand vnd bitt och hie mit vwer wirdekait vnd gnâd gar flyszklich vnd mit allen ernst, das ir su mit aller zugehorung vnd rechtung furbasser von vwren handen lihen wellint disen vorbenempten minen ohemen von Amptz. Das wil ich vmb vwer gnâd vnd gotzhus flyszklich vnd vast gedienen, wâ ich iemer kann. Geben vnd besigelt mit minem aigenn vffgedrukkten insigel ze end diser geschrifft an dem nachsten mantag vor vnsers herren vffart tag, anno domini etc. LXXXX^mo tercio. Von mir Eberharten von Sax⁴ dem eltern vwerm willigen vnd getruwen allzit.