Wir^a) Cun von gottez gnâden abt dez gotzhus ze sant Gallen, daz ân allez mittel zu gehort dem stul ze Rôm, veriehent, daz fur vns kam gen Wil¹ in vnsers gotzhus stat an dem tag, alz dirr brief geben ist, der from vest ritter herr Vlrich von Amptz der elter L vnd zôgt vns da ain offen brief besigelt mit dez fromen Eberharten von Sax dem elter insigel, an dem selben brief der vorgenant Eberhart von Sax veriach, daz er von siner redlicher not vnd kumerhafty wegen verkoft hetti alle die wingarten, die er ze L Rebstain in dem Rintall gelegen gehept hetti, mit allen iren zugehorden benempt ald vnbenempt, vss genomen den wingarten, den er vor zitten koft hetti von herr Rudolffen von Amptz, den man nampt den halbritter, den er mit aller zugehord dem vorgenanten L herr Vlrichen von Amptz dem elter vnd sinen kinden vor zitten mit vnser hand gefugt vnd gemachot hetti in rehtz gemahtz wis, vnd och vss genomen den wingarten, den man nempt den Englaberger, der von vnserm gotzhus sin lipding wari vnd nit furo, vnd die vorgenanten wingarten von vns vnd vnserm vorgenanten gotzhus ze sant Gallen sin reht lehen wari, vnd hetti die vorgenanten wingarten ze Rebstain gelegen mit allen rehten nutzen vnd gewonhaiten ze koffent geben sinen lieben ohemen herr Vlrichen von Amptz ritter dem elter, her Marwarten ritter, Vlrichen, Brunen vnd Gosswin von Amptz gebrudern dez selben herr Vlrichs elichen sun, herr Vlrichen von Amptz ritter, Rudolffen von Amptz gebrudern herr Eglolffs saligen von Amptz ritter elichen sun, vnd och Hansen von Amptz willent dez jungen herr Vlrichs von Amptz ritter elichen sun allen gemainlich vnd vnuerschaidenlich vmb drythalb hundert pfunt pfennig guter Costentzer muns, der selben pfennig er gantzlich gewert wari, vnd won er von krankhait sins libez selber zu vns nit mê komen moht, so hett er die selben wingarten mit dem selben brief mit allen rehten ledklich vff gesent an vnser hand, vss genomen den wingarten, den er vor zitten koft hetti von herr Rudolffen von Amptz ritter, den man nampt den halbritter, den er mit aller zugehord dem vorgenanten herr Vlrichen von Amptz dem elter vnd sinen kinden vor zitten mit vnser hand gefugt vnd gemachot hetti in rehtz gemahtz wis, vnd och vss genomen den wingarten, den man nempt den Englaberger, der von vnserm gotzhus sin lipding wari vnd nit furo, vnd batt vns ernstlich an dem selben brief, die selben wingarten den vorgenanten von Amptz allen gemainlich vnd vnuerschaidenlich lihen ze rehten lehen vnd ze ainer rehter gemaind. Do erhorten wir sin ernstlich bett vnd habent die vorgenanten wingarten ze Rebstain gelegen, wie die genempt sint, vss genomen den wingarten, den er vor zitten koft hetty von herr Rudolffen von Amptz, den man nampt den halbritter, den er mit aller zugehord dem vorgenanten herr Vlrichen von Amptz ritter dem elter vnd sinen kinden vor zitten mit vnser hand gefugt vnd gemachot hetti in rehtz gemahtz wis, vnd och vss genomen den wingarten, den man nempt den Englaberger, der von vnserm gotzhus sin lipding wari vnd nit furo, mit allen rehten nutzzen vnd gewonhaiten vnd mit aller zugehord, alz der vorgenant Eberhart von Sax sy inn gehept vnd genossen hett, den vorgenanten von Amptz allen gemainlich vnd vnuerschaidenlich verlihen vnd verlihent inen mit disem brief ze rehten lehen vnd ze ainer rehter gemaind, vns vnd vnserm vorgenanten gotzhus ze sant Gallen an allen vnsern rehten vnd gewonhaiten an den selben wingarten gentzlich vnschadlich, vnd enzech sich do der vorgenant Eberhart von Sax fur sich vnd all sin erben vnd enzicht sych^b) mit disem brief gen den vorgenanten von Amptz allen gemainlich vnd iren erben aller aigenschaft aller lehenschaft aller^c) rehtez gaistlichen vnd weltlichen gerihtes aller vordrung vnd ansprach, so er an den vorgenanten wingarten ze Rebstain gelegen darzu hett ald er vmer gewinen moht. Der vorgenant Eberhart von Sax der elter hat och gelopt fur sich vnd sin erben, der vorgenanten wingarten vnd dez kofs reht wêr ze sint nach dem rehten gen menglichem, wenn ald wie digg sy die vorgenanten von Amptz ald ir erben bedurfent ald notdurftig sint, an gevard. Vnd dez ze warem vrkund habent wir abt Cun da obgenant vnser insigel offenlich gehenkt an disen brief. Dar nach vergich ich Eberhart von Sax der elter da vorgenant ain gantz warhait aller vorgenanten ding, dz allez dz war ist, so der hohwirdig furst min gnadiger herr abt Cun da obgenant von mir veriehen vnd verschriben hat an disem brief, vnd ze merer sicherhait der selben ding so han ich och min aigen insigel offenlich gehenkt an disen brief vnd han och ze ainer zugnust der warhait aller vorgenanten ding gebetten diz from man Vlrichen von Ramswag Burkhartz saligen von Ramswag² elicher sun, Hansen Stoklin statamman ze Veltkilch³, Hartman von Schonow⁴, daz die ir aigen insigel och gehenkt hand an disen brief. Dar nach veriehent wir die vorgenanten Vlrich von Ramswag, Hans Stoklin vnd Hartman von Schonow, dz wir von ernstlicher bett wegen Eberhartz von Sax dez elter vnsru insigel offenlich gehenkt habent an disen brief vns vnd vnsern erben gentzlich vnschadlich. Geben ze Wil in vnsers gotzhus stat an dem nahsten zinstag vor der vffart, in dem iar, do man zalt von Cristi geburt tusent druhundert nunzig vnd in dem drytten jar.