Wir Cun von gottes gnaden apt des gotzhus zu sant Gallen², das ane alles mittel zugehort dem stul ze Rome, veriehent, als die erber lut Walther zum Spicher³, Vlrich Kern, Herman Muller, Herman Gasser, Herman vnd Gerwig Belen, Walther Wilhelm die hoffstatt, die man nempt Vnser frowen Bul⁴, durch gotz willen vnd durch ir sel vnd hails willen geben hand arman brudern, won ouch die selb hoffstatt lehen ist von vnserm vorgenanten gotzhus ze sant Gallen, so haben wir sy verlihen bruder Haintzlin dem Sturman mit solichem geding, wenn der selb bruder Haintzli abgat von todes wegen, welhen bruder denn dar in wil, der selb sol die selben hoffstatt empfahen von ainem herrn ze sant Gallen vnd dem geloban gehorsam sin. Wer aber, ob me bruder dar in woltin, als vil ir ist ainer oder me, die selben ieglicher sol die selben hoffstatt ouch empfahen von vns oder vnsern nachkomen vnd loben, ainem herrn gehorsam sin. Wer ouch, dz die bruder all absturbind vnd man kain fundi, der in das hus wolti, so mag ain herr von sant Gallen armen swostran die hoffstatt durch gottes willen verlihen ouch mit solichem geding, als von den brudern vorstat. Wir haben ouch den brudern vnd den swostran die gnad getan, wenn ir ains abstirbt, was es denn hat, das sol in dem hus beliben vnd sond es die andern bruder vnd swostran niessen durch gotz willen. Wer ouch, das die bruder all absturben vnd man nienen arm swostran fundi, die durch gotz willen dar in wolti, so mag ain herr von sant Gallen sin amptman haissen alles, das die bruder gelassen hand, vnd das legen an des munsters buw ze sant Gallen. Item also sol es ouch sin vmb die swostran ze glicher wis. Vnd des zu vrk(und) so haben wir apt Cun da obgenant vnser insigel offenlich gehenckt an disen brieff. Geben ze Appenzell⁵ vff vnsers gotzhus vesti an dem nehsten sunnentag nach vnsers herren fronlichams tag in dem jar, do man zalt von Crists geburt tusent druhundert nuntzig vnd in dem drutten jar.