Wir^a) Elisabetha Rudlinger von gottes verhengde abbtissin vnd der conuent gemeinlich des klosters ze Thennikon¹ sanct Bernhartz L ordens in Costenzer bystum gelegen tun kunt vnd veriechen offenlich mit disem brief fur vns vnd vnser nachkomen, die wir vestlich vnd mitt L sunderheit hie zu binden, allen den, die in an sechent oder horrent lesen, das wir mitt guter vorbetrachtung vnd mitt einhelligem rat verhengt L vnd gunnen hant vnd verhengen mitt disem brief, als du erberr geistlich frow Elsbetha von Lindenberg² vnsri klosterfrow da her vil zites ein liecht in irem kosten gehept hat vor dem kelrr in vnserm krutzgang, als si da in den sin komen ist, dz si luterlich dur got dur ira vnd aller ir vordren selen heiles willen jerlichen vss allen iren nutzen vnd gutern zwen mutt kernen Wiler³ messes einer kustrinen geben wil, die wil vnd si lept, vff diss nachgeschribnen ordnung, des ersten an dz vorgenant liecht vor dem kelrr ein mutt kernen geltz, darumb dz das selb liecht nechtlich enzunt werd von einer portnerinen, weli ie denn dz ist, vnd nechtlich brunn, vntz man nider gat vnd all turen beschlossen werdent, dz man es denn losch vnd dz dur dz jar nechtlich beschech, vnd ein mutt kernen an dz liecht, dz da hanget ob irs bruder vnd swester seligen grab im krutzgang dur deren vnd aller geloibigen selen heiles willen vnd sunder dur aller der selen willen, der lichamen zu vnserm dem obgenanten gotzhus ruwent sint, in aller der ordnung form vnd mass, als dz selb liecht geordnet ist von ir ze entzunden vnd ze brennen, als si es geordnet hat oder noch wurd ordnent, ob si sich bessers bedecht, mit den gedingen, wenn si enist, dz denn vss allen den jerlichen nutzen vnd gutern, so si dann lassent ist, nach ir tod vnser gotzhus die selben liechter versorgen sol mit einer kustrinen, weli denn iê dz ist, der man och denn jerlichen die zwen mutt kernen zu ir ampt weren vnd richten sol an allen furzug vnd an alles ab brechen, vnd da mitt och denn du liechter getrulich vnd ernstlich versorget werden sont vff einr kustrinen sel vnd er, dar zu wir du obgenanten eptischin vnd conuent der vorgenanten Elsbethen von Lindenberg, die wil si lept, gunst vnd willen geben vnd verhengen, vnd nach ir tod vnd hinuart loben wir es ze tun fur vns vnd vnser nachkomen bi guten truwen vnd bi vnsers ordens eren vnd vff vnser selen. Vnd des alles ze vergicht vnd ewiger bestetung dieser ordnung han wir du obgenanten eptischin vnd conuentt vnsri eigenni ingesigel offenlich gehenkt an disen brief fur vns vnd all vnser nachkomen. Der geben ist in dem jar, do man zalt von Cristus geburtt druzehen hundert vnd nuntzig jar, dar nach in dem dritten jar, an dem frytag vor santt Johans tag ze sungichten.