Wir^a) ffrow Clement grafenn von Tokkenburg¹ wilent her Hainrichs salgen herren ze Hewen elichi wirtenn vnd Peter L herr ze Hewen² ritter ir vnd des ietzgenanten her Hainrichs salgen elicher sun veriehen vnd tunt kunt allermenglichem mit disem L brief, daz wir baidu gemainlich vnd vnuerschaidenlich wissentklich vnd wolbedahtklich fur vns vnd fur WolfLlin och herren ze Hewen³ min des ietzgenanten Peters bruder vnd fur alle vnser erben von vnser kumberhaftin wegen verkoft haben ain gutli ze Gutisedel⁴ zwischan Lomezz⁵ vnd Betwisen⁶ gelegen mit hus mit hof mit hofstatt mit hofraiti mit akker mit wisan mit holtz mit veld vnd mit allen rechten nutzen zinsen gewonhaiten vnd mit aller zugehord, daz vnser recht aigen was, vnd haben daz ains vngeuarlichen ewigen kofs ze koffent geben den erbern luten Adelhaiten wilent Haini Schmids salgen von Betwisen elichen ffrowen Cuni Wagners von Aschlikon⁷ elichen tohter vnd Margrethen, Elsbethen vnd Hainin iro baider elichen kinden vnd allen iren erben vmb siben vnd sehtzig pfund pfen(ning) alles guter vnd genamer Costentzer muns, dero wir och aller gantzlich vnd gar nach vnserm nutz vnd willen von inen bezalt syen, vnd haben inen dasselb gutli ze Gutisedel mit aller zugehord ledklich vnd ffrilich fur vns vnd fur den obgenanten Wolflin herren ze Hewen vnd fur vnser aller erben fur recht aigen zu iren vnd zu iro erben handen braht vnd geuertgot vnd si des in liblich nutzlich gewer gesetzt, alz recht sitt vnd gewonlich was, vnd haben vns hier vber gegen der obgenanten Adelhaiten Schmidinen vnd gegen den obgenanten iren kinden vnd gegen allen iren erben ledklich vnd frilich verzigen vnd verzihent vnd entwerent vns och redlich vnd recht mit disem brief fur vns vnd fur den obgenanten Wolflin herren ze Hewen vnd fur alle vnser erben^b) aller aigenschaft aller lehenschaft aller manschaft aller gewer aller kuntschaft aller zugnust lut vnd briefen alles tails aller gemaind alles rechten gaistlichs vnd weltlichs gerichts aller rechtung aller vordrung vnd ansprachen, so wir ald vnser erben ald ieman andra von vnsern wegen zu dem obgenanten gut mit aller zugehord ie gehatten ald hernach iemer mer gewinnen mohtent von recht ald von gewonhait ald von dehainerlay andren sach wegen, so ieman erdenkan kan. Wir sollenn vnd geloben och bi guten truwen fur vns fur den obgenanten Wolflin, den wir vesteklich herzu bindent mit disem brief, vnd fur alle vnser erben, des obgenanten guts fur aigen ze Gutisedel mit aller^c) vorgenanten rehten vnd mit aller zugehord vnd dis kofs der obgenanten Adelhaiten Schmidinen vnd der obgenanten Margrethen, Elsbethen vnd Hainis ir elicher kint vnd iro erben gen allermenglichem allenthalben, wenn wa ald wie dik si des bedurfent ald dar vmb von ieman mit dem rechten angesprochen werdent, recht wern ze sint nach dem rechten vnd nach des landes sitten vnd gewonhait an geuard. Vnd des alles ze offem vrkund der warhait so haben wir obgenanten ffrow Clement vnd Peter von Hewen vnsru insigel fur vns fur den obgenanten Wolflin herren ze Hewen offenlich gehenkt an disen brief. Der geben ist an sant Johans aubent des Toffers ze sunnwendi, do man zalt von Cristus geburt druzehenhundert vnd nuntzig jar, dar nach in dem dritten jar.