Wir^a) Cun von gottes gnaden abt des gotzhus ze sant Gallen¹, dz an alles mittel zu gehort dem stul ze Rom, veriehent, dz L fur vns kam ze Wil² in vnsers gotzhus statt an dem tag, als dirr brief geben ist, der beschaiden Vlrich Aigendal burger ze L Winterthur³ vnd sprach, wie dz Aidelhait Beringerin wilent Hartmans Scherers saligen elichu husfrow burgerin ze MelLlingen⁴ vns bi im vff gesent hett an vnser hand ainen akker ist gelegen ze Mêllingen an der Gebraiten⁵ stosset an halb an Haini Pfisters akker vnd andren an des kilchherren akker vnd och an Vlis Gernass akker, den si von vns vnd vnserm vorgescriben gotzhus ze erblehen hetti, vnd der selb Vlrich Aigendal solti vns bitten in namen vnd an stat der selben egenanten^b) Aidelhaiten vnd och von ir wegen, dz wir den vorgenanten akker vnd allu reht, die si an dem vnd zu dem vorgenanten akker mit aller zugehord hat vnd gehaben mag, lihint ze erblehen dem beschaiden kneht Vlrichen Gernass burger ze Mellingen der selben Aidelhaiden tochterman, vnd also gab vns der vorgenant Vlrich Aigendal vor in namen vnd anstatt vnd von der vorgenanten Aidelhaiden wegen den vorgenanten akker vnd allu du reht, die si dar zu vnd dar an hat vnd gehaben mag, vff an vnser hand vnd batt vns von der ietzgenanten Aidelhaiden wegen ernstlich, dz wir den selben akker vnd wz si rehtes zu dem selben akker hat, dem egedahten Vlrichen Gernass der selben Aidelhaiden tochterman lihint ze erblehen. Darvmb erhorten wir do des selben Vlrich bett vnd lihint den selben akker mit allen den rehten, so die selb Aidelhait dar zu hat, dem vorgenanten Vlrichen Gernass ze erblehen vnd lihint im mit disem brief, wz wir im durch reht an dem selben akker^c) lihen sollent, vns vnd vnserm vorgenanten gotzhus an vnsern rehten zinsen vnd gewonhaiten des selben akkers gantzlich vnschadlich. Vnd des hiervber ze offnem vnd warem vrkund alles, so hie vor an disem brief geschriben stat, haben wir abt Cun da obgenant vnser insigel offenlich gehenkt an disen brief. Dar nach vergich ich Vlrich Aigendal burger ze Winterthur ain gantz warhait alles des, so der hohwirdig furst Cun von gottes gnaden abt des gotzhus ze sant Gallen min genadiger herr von mir an disem brief veriehen vnd verschriben hat, vnd ze merer sicherhait aller vorgeschribner ding han ich och min aigen insigel offenlich gehenkt an disen brief. Der geben ist an sant Lienharts tag in dem jar, do man zalt von Cristi geburt tusent druhundert nunzig vnd dru jar.