Wir^a) Cun von gotes genâden vnd dez stules ze Rom bestater abt dez gotzhus ze sant Gallen¹ sant Benedicten ordens in L Costenzer bystum gelegen, daz an alles mittel zugehort dem stul ze Rom, tugint kûnt vnd veriehent offenlich mit disem L brieue allen, die in sehent lesent oder horent lesen, daz fur vns kâment ze Wile² in vnser statt an dem tag, alz dirre L brief ist geben, diz nâchgenempten êrbern wolbeschaidenn Cunrat Rusch der muller ze ainem tail vnd Johans Eggrich Bartholomes Eggrichs saligen êlicher sûn ze dem andern tail baid burger ze sant Gallen, vnd vrkûndot vnd veriach och do der vorgenempt Cunrat Rusch offenlich vor vns vnd sprach, daz er mit wolbedachtem mute von siner rechten rêdlicher note wegen die muli vnd mulistatt gelegen ze sant Gallen vor Husstor³ vnder der Bernêgg⁴ ze aller nahst bi Othmar Wildrichs muli, die vns vnd vnsrem gotzhus jarlichs zins gabe dritthalb phûnt phenning Costenzer munse, daz akkerli och gelegen ze sant Gallen bi der statt vnd ainhalb stosset an die hindern Staig⁵ vnd andert an Hainrichs Schulmaisters berg, dâ och vnserm gotzhus jarlichs ab giengi ain halber stoff wines, vnd daz hus gelegen in der statt ze sant Gallen an Spiser Gassen⁶ ze aller nahst an Hainrichs Kappellers hus mit hofraiti vnd mit aller zugehorde recht vnd rêdlich verkofft vnd aines staten êwigen koffes ze koffenn geben hetti dem egenempten Johansen Êggrichen vnd allen sinen êrben vmb sechs hûndert phûnt vnd drissig phûnt guter vnd genger haller, die er dâr vmb enphangen hett vnd an sinen offenn nûtz bewendet warint, die selben guter allu sin lêhen von vns gewesen warint, vnd batt vns ernstlich, daz wir die selben guter allu mit allen zugehorden an vnser hand von siner hand vfnamint vnd die selben guter lihint dem egenempten Johansen Eggrichen siner tochter man. Do erhortant wir sin ernstlichen bette vnd nament von siner hand vf an vnser hand die selben vorgeschribenn guter mit allen rechten vnd zugehorden vnd habens gelihen dem obgenanten Johansen Eggrichen vnd lihent im mit disem brieue die vorgeschribenn muli vnd mulistatt daz egedâcht akkerli vnd daz hus vnd hofraiti, alz vor beschaiden ist, alles mit allen rechten nutzen vnd gewonhaiten vnd mit allen zugehorden, vns vnsern nâchkomen vnd dem vorgeschribenn vnserm gotzhus an den egedachten zinsen vnd an allen vnsern rechten nutzen vnd gewonhaiten gantzlich vnschadlich, vnd entzech sich och do der obgenant Cunrat Rusch vss siner hand zu dez egenanten Johansen Eggrichs handen gantzlich vnd gar aller aigenschaft aller lêhenschaft aller kûntschaft aller gewêr lute vnd brieue aller recht vordrûngen vnd ansprâchen gaistlichs vnd weltlichs gerichtes, so er ald sin erben an den vnd zu den vorgeschribenn gutern ald zu dehainen iro zugehorden ie gehebt hant ald hie nâch iemer mêr gehaben oder gewunnen mochtent, vnd ist diz alles beschehen vnd recht vnd rêdlich volfurt, wie recht sitte vnd gewonhait waz, daz ez kraft vnd maht hât vnd gehan mag ietz vnd hie nâch. Vnd ze offenem wâren vrkunde vnd stater sicherhait aller dirre vorgeschribenn dinge vnd vergicht so haben wir Cun abt da vor genempt vnser insigel von dirre vorgedâchten lêhenschaft offenlich an disen brief gehenket, vnd ze mêrer sicherhait der selben dinge vnd aller der vergicht, so der hohwirdig furst min genadiger herr abt Cun dâ vor genempt von mir obgenanten Cunraten Ruschen veriehen hât, so han ich der selb Cunrat Rusch min aigen insigel fur mich vnd min erben offenlich an disen brief gehenket. Der geben wart ze Wile in dem jâre, do von Cristi geburt wârent druzehenhûndert jâr, nunzig jar vnd dar nâch in dem dritten jâre, an dem nahsten sampstag vor sant Katherinen tag.