Wir graf Donat von Toggenburg¹ veriechend offenlich mit vrkund dis briefs allen dien in ansechend lesend oder horend lesen, das wir mit vnserm lieben vettern graf Fridrichen von Toggenburg vnsers lieben bruders seligen graf Diethelms² sune tugentlich vnd lieplich eins fruntlichen lieplichen teils in ein vnd vberein komen sind, also das imm ze tail worden ist die vesti ze Toggenburg³ halb mit dem graben, so si begriffen hat, wisen vnd ackern wunne vnd waiden, so an der selben halden ligend, aber Vtzenach⁴ burg vnd statt mit aller zugehor bis hinab gen Ruti⁵ vnd gen Rapreschwil⁶ vnd die hof ze angendem Wald⁷ mit aller zugehord, mit den hofen vff der Lad⁸, twing vnd bann, bis an den Rickon⁹, aber hundert mannmad wisen an Alten¹⁰, die vesti ze Grinow¹¹ mit aller zugehord, vnd die ober March¹² mit aller zugehord, die hof ze Tugken¹³, die hof ze Wangen¹⁴, den kilchensatz ze Vtznach, den kilchensatz ze Wangen, den kilchensatz ze Sumbri¹⁵, die pfantschafft ze Rapreschwile mit aller zu gehord, aber die vesti ze Maienfeld¹⁶ burg vnd statt, das dorff ze Flasch¹⁷, den zoll ze Maienfeld, die vesti ze Winegg¹⁸, die vesti halb ze Fragenstein¹⁹, die vesti zu Solafers²⁰, die vesti zu Kapfenstein²¹ vnd was zu denen vestinen gehort, das land in Brettigow²², das land ze Tafaus²³, die vesti ze Bellfort²⁴, das dorff vnd den zoll ze Lentz²⁵, die vesti zu Strasberg²⁶, das land ze Schanfigk²⁷ vnd ze Zerschis²⁸, die vesti ze Marschenens²⁹, den hof ze Trimos³⁰, die zechenden ze Bustrils³¹, lut vnd gut ze Malans³² was wir da hand, den kilchensatz zu Schiers³³, den kilchensatz ze Sausch³⁴, den kilchensatz ze Alfenu³⁵ vnd die gwaltsami bis an den brunnen ze Baltzers³⁶ herab, aber das pfand ze Zitzers³⁷, aber das pfand ze Ragatz³⁸ mit allen iren zugehorden. Dis vorgenanten vestinen wiler dorffer kilchensatz lut vnd guter, so wir in dem selben kraiß hand, wingarten wingelt korngelt kasgelt fleischgelt schaffgelt vischgelt pfeffergelt pfenninggelt zins sturen vnd zechenden, alles mit wisen ackern mit holtz mit veld wonne mit waiden mit grund mit grat benempts vnd vnbenemptz gesuchts vnd vngesuchts gericht twing vnd bann, mit allen rechten vnd zugehorden sind vnserm vorgenanten vettern graf Fridrichen ze teil worden. Vnd was in disem brief nit begriffen vnd benempt ist, das in disen kreisen gelegen ist, das sol doch zu disem tail gehoren vnd disem tail enkainen schaden bringen, vnd was von der herrschafft lechen ist, das sollend wir lichen vnserm vorgenanten vettern vndschadlich, wann das im dauon beschechen sol nach lechens recht. Vnd were, das vt ledig wurde oder dehain ander zufall beschech, das sollend wir nit lijchen on sinen gunst vnd rat, vnd wer, das die lechenschafft an inn fieli, das sol er ouch also lihen vnsern erben one schaden. Vnd des ze vrkund ze warhait vnd ze merer sicherhait aller vorgeschribner ding hand wir graf Donat von Toggenburg der vorgenant vnser insigel offenlich gehenckt an disen brief. Der geben ist ze Liechtenstaig³⁹ in vnser statt am nechsten tag nach dem ingenden jar, das ist der ander tag des jenners, anno XIIJ^to vnd LXXXXIIIJ^o.