Ich^a) Clement von Hewen geborn von Toggenburg¹ vergihe vnd tun kunt offenlich mit disem briefe allen den, die in an sehent lesent oder horent L lesen, das ich angesehen habe den getruwen dienst, so mir der fromm bruder Vlrich von Tettingen commentur des huses ze Tobel² getan hat, vnd L och die fruntschaft, die mir von dem selben huse beschehen ist, vnd sunderlich die tugend, so mir der vorgenant commentur getan hat, das er mir L die genossami geben hat von der frowen Elsinen Akkermannin Hansen Pluwels ab dem Imiberg³ eliche wirtin, die des vorgenanten huses ze Tobel reht eigen ist, vnd was kint si bi einander gewinnent, die sond in rehter gemeinschaft halb min vnd miner erben sin vnd halb des vorgeschribnen huses ze Tobel. Vnd vmb das so han ich dem egenanten commentur vnd dem huse ze Tobel die gnad vnd fruntschaft hin wider vmb getan vnd verheissen vnd verheisses och mit krafft dis briefes, were das sich fugte, das ich den egenanten Hansen Pluwel sin muter vnd sine kint, die er hat oder noch gewinnet bi der egenanten Elsinen Agkermennin siner elichen wirten, die selben kint min vnd des egenanten huses ze Tobel reht gemeind sint, verkoffen wurdi oder verkoffen wolti, so sol ich sy dem vorgenanten commentur des huses ze Tobel vnd sinen nachkomen vor aller menglichem bieten vnd ze koffend geben, ob si die koffen wellent. Were aber, das si die nit koffen woltent, so mag ich sy denne bieten vnd verkoffen, wem vnd wo ich wil, als es mir aller fuglichest ist, one ira vnd allermengliches widerrede sumnisz vnd irrung. Vnd des ze einem waren vrkund vnd gezugnisz aller vorgeschribener ding so han ich min eigen ingesigel gehenket an disen brieff. Der geben ist ze Engen⁴ in dem iar, do man zalt von Cristus geburt druzehenhundert nuntzig vnd vier jar, vff sant Agathen tag der heiligen jungfrowen.