Ich^a) Vrsul die Paygrerin wilent her Vlrichs dez Paigrers salgen ains ritters vogt ze Arbon¹ elichy husfrow tun kunt vnd vergich dez offenlich an disem brieff L fur mich vnd minu kind vnd vnser erben vnd nachkomen, daz fur mich kam ze Arbon in der statt an dem tag, alz dirre brieff geben ist, der erber knecht L Vli Ortwin von Stacha² vnd offnata vnd veriach vor mir, daz er mit den ersamen luten pfleger vnd maister dez spitals ze sant Gallen³ ainen lieplich wechssel L getan vnd volfurt hette vnd den selben pfleger vnd maister vnd och dem spital ze sant Gallen geben hetti vsser dem gut vnd lehen ze Stacha, daz er buwti, die ruti, die gelegen ist an dem Nidren veld⁴, die man nempt dez Trogers ruti, vnd ain akerli ist och gelegen an dem Nidren veld in dem sinwelen mos, vnd hettint im die obgenanten pfleger vnd maister da fur vnd da wider geben ainen akker ist gelegen ze Obra Stacha an dez obgenanten Vlis Ortwins huss vnd den man nempt Cuntzen akker, vnd batt mich och der obgenant Vli Ortwin gnadklich, daz ich zu dem vorgeschriben wechsel minen willen vnd gunst darzu geben vnd verhengen welti, won ez dem obgenanten sinem lehen besser war getan denne vermitten, die batte hab ich gewert, won sy mich redlich dunkt, vnd vergich dez offenlich an disem brieff fur mich vnd minu kind vnd vnser erben vnd nachkomen, daz der vorgeschriben wechssel mit minem guten willen vnd gunst vnd verhegnust beschechen vnd volfurt ist mit solicher beschaidenhait vnd gedinge, daz ich vnd minu kind vnd vnser erben vnd nachkomen noch der obgenant Vli Ortwin noch dehain sin erben vnd nachkomen an dem vnd zu dem vorgeschribner ruti vnd akerli dehain vordrung nach ansprach nut mer haben noch gewinnen soltint in dehainer lay wise noch mit dehainen sachen, vnd soltint die obgenanten pfleger vnd maister dez spitals ze sant Gallen vnd alle ira nachkomen die vorgeschribnen ruti vnd daz akerli mit allen rehten vnd zugehorten haben vnd niessen besetzzen vnd entsetzzen alz ira aignu guter vnd solti su daran nieman ierren noch sumen mit dehainen sachen. Die obgenanten pfleger vnd maister dez spitals ze sant Gallen noch dehain ira nachkomen sont och dehain vordrung reht noch ansprach haben zu^b) dem vorgeschriben akker weder lutzel noch vil mit dehainen sachen. Vnd dez allez ze warem offem vrkunt vnd ze ainer statter ewiger sicherhait allez dez, so hie vorgeschriben stat, so han ich die obgenant Vrsul die Paigrerin min aigen insigel fur mich vnd minu kind vnd vnser erben vnd nachkomen gehenkt an disen brieff. Der geben ist ze Arbon in der statt in dem jar, do man zalt von Cristus geburt druzechen hundert jar, nunzig jar, darnach in dem vierden jare, an dem nechsten zinstag nach sant Agthen tag.