Ich^a) Johans Entzziswiller vnder vogt der statt ze sant Gallen¹ von des hailigen Romschen riches wegen tun kunt vnd vergich offenlich mit disem brieue allen, die in ansehent lesent oder horent lesen, das fur mich kam ze sant Gallen in L der stat an dem tag, alz dirre brief geben ist, Iohans Gul der schumacher Cunrat Guls salgen êlicher sun vnd offnot vnd veriach da der selb Iohans Gul offenlich vor mir frilich willeklich vngebunden vnd vngefangen von L der vanknust wegen, als in die frômen wisen der burgermaister der rât vnd die burger gemainlich der stat ze sant Gallen gehaimot in iro stok des hailigen richs kâmer in iro vanknust vnd banden hatten vnd in fur mich fur L offen geriht an des richs strasse gefurt vnd zu im geklegt vnd in wider von dem geriht mit minem willen genomen vnd in iro vanknust vnd band gelait hettint, vmb das su mich in schulde hatten, als Eglolfen Stober von Appacelle² och burger ze sant Gallen nahtes in sin gaden gebrochen vnd ain schurletztuch vnd etweuil wullins tuches darus verstoln war, vnd aber er sprachi, daz er das selb schurletztuch vnd och das wullin tuch nahtes an des riches strasse funden vnd vfgehaben vnd also zu sinen handen gezogen hett, won aber die selben der burgermaister der rat gemainlich ze sant Gallen in vor an durch des erwirdigen fursten mines gnadigen herren abt Chun abt des gotzhus ze sant Gallen³ durch der ersamen Johansen von Bussnang probst⁴, Hainrichs von Gundelfingen werchtegans⁵, Georien von Enne closterherre⁶ des selben gotzhus ze sant Gallen durch dero von Wil⁷, von Appacelle vnd von Huntwille⁸ vnd durch siner frunde ernstlicher bett willen vss der selben vanknust vnd banden ledig gelassen hettint, darumb so wolt er sich aller nahgeschribenen sach artikel vnd dinge willeklich vnd gern verbinden, als hie nach beschaiden ist an disem brief. Des ersten do swur der selb vorgenant Iohans Gul offenlich vor mir frilich willeklich vnd vnbetwungenlich vngebunden vnd vngefangen gesund libes vnd mutes mit guter vorbetrahtung ainen gelerten aide liplich ze got vnd zu den hailigen mit vfgehabenen vingern, vmb die vorgedahten vanknust vnd getat der vorgedahten des burgermaisters des rates vnd aller burger vnd burgerinen gemainlich der stat ze sant Gallen vnd iro iekliches besunder vnd sunderlich mit namen aller dero, die an der selben siner vanknust vnd getat schuld gehebt hant, in dehain wis ratent ald helffent oder gehaft darzu gewesen sint, luter gantz vnd gut frund ze sinne vnd alle sin frund inen darumb ze frund ze gewinnen ân allen furzug vnd die selben vanknust vnd getat niemer ze andenn noch ze aferrenn weder mit gaistlichem noch^b) mit weltlichem geriht noch ân geriht weder mit worten noch mit werken in kain wise noch nieman andre an siner stat noch von sinen wegen ân alle geuarde, vnd och wider die selben den burgermaister den rat vnd die burger gemainlich ze sant Gallen niemer ze sinne noch ze tunne in kain wise ân alle geuarde. Der selb Iohans Gul nam och do in den selben aide vnd swur, das er vff disen huttigen tag, alz dirre brief ist geben, vss der vorgedahten stat ze sant Gallen ainer mil verre von der selben stat ze sant Gallen gan oder varn sol, vnd sol denne darnach inrent den nahsten vier tagen furo von der selben stat ze sant Gallen zehen mil verre mit der egenanten mile alles Tutscher milen ân allen furzug gan oder varn vnd danne dannenhin zu der selben stat ze sant Gallen inrenthalb zehen Tutscher milen nach allenthalben zu der selben stat ze sant Gallen niemer me eweklich ze komenn ân alle geuarde. Der selb Iohans Gul nam och do in den selben aide vnd swur, war das er vff disen huttigen tag, alz dirre brief ist geben, oder hie nach iemer dehainer lay sach stosse oder ansprachen hetti ald gewunne zu den burgern gemainlich ze sant Gallen oder zu dehainem burger oder burgerinen ze sant Gallen besunder, es sien man oder frowen knaben oder tohtren, su sien ietz da selbs burger oder die hie nach da selbs burger werdent, wolti er darumb rehtes nut enbern, so sol er danne die selben sin ansprachen vnd klag ainem sinem gewissen botten enphelhen vff gewin vnd vff verlust, der den oder die, zu den er ie danne ze sprechenn hat, an siner stat darumb vf tribe vnd rehtes gen in phlegen ze sant Gallen in der stat da selbs vor irem geriht nach der stat reht, vnd sol su och niendert anderswa darumb vf triben vordren aischen noch beklagen weder mit gaistlichem noch mit weltlichem gerihte noch ân reht, das hat er alles in den aid genomen vnd gesworn, ez war danne, das des selben Iohansen Guls gewissi botschaft da selbs rehtlos gelassen wurde vnd das och das da selbs ze sant Gallen offen vnd kuntlich wurde, so ist im behalten vnd in dem aide vssgelassen, das er daz reht ie danne, von dem sin botschaft dann also rehtlos gelassen sint oder der in dann da selbs widerhor worden war, anderswa suchen sol vnd mag, da es danne billich vnd muglich ist, ân geuarde. Beschach aber, da vor got sie, daz der vorgenant Iohans Gul den vorgeschribenn aide iemer uber fur oder ieman andre von sinen wegen ald an siner stat an dehainen vorgedahten stuken vnd artikeln in dehain wise mit dehainen sachen, so sol danne der selb Iohans Gul den selben vorgedahten dem burgermaister dem rat vnd gemainer stat ze sant Gallen hundert mark gutes lotiges silbers Costentzzer gewages gantzlich verfallen sin ze gebenn nach der ersten vordrung inrent den nahsten drin manoten, vnd hat och der selben gemainer stat ze sant Gallen darumb zu im ze besser sicherhait dis nachgenemten erberen lut Herman Gul sinen êlichen bruder, Hugen Hofakrer, Beringer Schulmaister, Hainrichen Nanggiswille, Ôthmar Vogel den kuphersmit, Vlrichen Schorant den man nempt Vliman, Hainrichen Kessler den karrer, Hainrichen Vsserman genant Haini Tobler, Iohansen Vorster den satler, Hainrichen Basthart, Iohansen Kammer den sekler Hainrich Kammers êlichen sun, Rudolf Gul Steffan Guls êlichen sun, Iohansen Segenser den metzger alle burger ze sant Gallen, Hainrichen Brunner von Grind⁹, Hainrichen Hagger von Waldi¹⁰, Vlrichen Wildenstainer, Vlrichen Zidler baid von Appacelle, Herman Cunratz salgen von Gunta¹¹ êlichen sun, Gerwigen vnd Vlrichen Hermans von Gunta êlichen sun ze rehten burgen geben vnd gesetzt. Die selben burgen hant alle vnuerschaidenlich mit im gelobt ieklicher mit siner truwe willeklich frilich vnd offenlich vor mir zu gemainer stat ze sant Gallen handen, also beschach, das der selb Iohans Gul den vorgeschribenn aide iemer uber fur oder ieman von sinen wegen an dehainen vorgeschribenn stuken vnd artikeln in dehainen weg ald in dehain wis, das su danne mit im gemainer stat ze sant Gallen der vorgeschribenn hundert mark lotiges silbers des vorgenanten gewages gantzlich verfallen vnd der selben gemainer stat ze sant Gallen gebunden vnd haft sin sont vnuerschaidenlich das selb gut gantzlich ze geben vnd ze rihtenn nach der ersten vordrung inrent den nahsten drin manoten ân allen furzug, vnd sont vnd mugent och danne die selben obgenanten der burgermaister der rat vnd die burger gemainlich ze sant Gallen vnd iro ieklicher besunder vnd iro helffer, wer die sint, den vorgenanten Iohansen Gul vnd och die obgenanten burgen alle ald ieklichen besunder darumb phenden noten heften vnd an griffenn an ligenden vnd an varenden gutern in stetten in dorffern vnd vff dem lande mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wa hin su das getun mugent ald in fugklich ist, als vil vnd alz dik, vntz daz su der vorgeschribenn hundert mark lotiges silbers des vorgenanten gewages vnd och des schaden, in den su vnd iro helffer von des selben phendens notens heftens vnd an griffens wegen koment, gantzlich gewert vsgeriht vnd da von entschadgot werdent, vnd sol den obgenanten Iohansen Gul noch die obgenanten burgen noch kain iru gut hie vor noch da wider niht friien friden schirmen noch gut sin weder babstlichs kunglich noch kayserlichs geriht gewalt gesetzt gnâde frihait kain acht noch banne kain lantfrid kain buntnust kain geselleschaft kain burgreht kain gewonhait kain fund noch gesetzt, so ietz ist oder hernach funden gesetzt ald von ieman erdacht wurd, noch enkainer lay ander sach behelf schirm noch furzug, won su sich alles verzigen hant, ez war dann, das die obgenanten burgen den selben Iohansen Gul inrent den vorgedahten nahsten drin manoten nach dem vnd daz selb gut an si gevordrot ist, lebent oder tot ainem burgermaister vnd dem rat gemainlich ze sant Gallen geantwurtint gen sant Gallen in die stat in solichi band vnd gewalt, da su sin sicher sint, so sont dann die selben burgen alle vmb daz vorgeschriben gut vnd gelubt ledig vnd los sin. Vnd des alles ze offem warem vrkunde vnd ze ainer staten sicherhait aller der vorgeschribenn dinge vnd vergicht so han ich Johans Entzziswiller vnder vogt da vorgenant min insigel offenlich gehenkt an disen brief mir vnd allen minen erben gantzlich vnschadlich. Ich vorgenanter Iohans Gul vergich ainer gantzen warhait aller der dinge, so von mir an disem brief geschriben stat, vnd daz das war vnd stat belibe, so han ich erbetten den wolbeschaidenn Vlrich Spiesser och burger ze sant Gallen, daz er sin insigel fur mich gehenkt hat an disen brief, vnder des selben insigel ich mich willeklich gebunden han, won ich aigens insigels niht han, des och ich obgenanter Vlrich Spiesser offenlich vergich an disem brief mir vnd allen minen erben vnschadlich. Wir die obgenanten burgen Herman Gul, Hug Hofakrer, Beringer Schulmaister, Hainrich Nanggiswille, Othmar Vogel, Vlrich Schorant, Hainrich Kessler, Hainrich Vsserman, Iohans Vorster, Hainrich Basthart, Iohans Kammer, Rudolf Gul, Iohans Segenser, Hainrich Brunner, Hainrich Hagger, Vlrich Wildenstainer, Vlrich Zidler, Herman von Gunta, Gerwig vnd Vlrich von Gunta gebruder veriehent ainer gantzen warhait aller der dinge, so von vns an disem brief geschriben stant, vnd ze besser sicherhait der selben dinge so haben wir die ietzgenanten Hug Hofakrer, Beringer Schulmaister, Hainrich Nanggiswille, Othmar Vogel, Vlrich Schorant vnd Hainrich Kessler vnseru aigenu insigel offenlich gehenkt an disen brief, vnd won wir die obgenanten Herman Gul, Hainrich Vsserman, Iohans Vorster, Hainrich Basthart, Iohans Kammer, Rudolf Gul, Iohans Segenser, Hainrich Brunner vnd Hainrich Hagger aigener insigel niht haben, so haben wir erbetten den ersamen Jacob Rupreht, den man nempt Low, stat amman ze sant Gallen¹², daz er sin insigel fur vns gehenkt hat an disen brief, vnder des selben insigel wir vns willeklich gebunden haben, doch im vnd sinen erben vnschadlich, vnd won wir die obgenanten Vlrich Wildenstainer, Vlrich Zidler, Herman, Gerwig vnd Vlrich von Gunta och aigener insigel niht haben, so haben wir erbetten den beschaidenn Hainricen Eberhart burger ze sant Gallen, daz er sin insigel fur vns gehenkt hat an disen brief, vnder des selben insigel wir vns willeklich gebunden haben, des och ich obgenanter Hainrice Eberhart offenlich vergich an disem brief mir vnd minen erben vnschadlich. Diz beschach vnd ward dirre brief geben ze sant Gallen in dem jar, do man von Cristus geburt zalt druzehenhundert jar, nunzig jar vnd darnach in dem vierden jare, an sant Pancracien tag ze maiien.