Allen^a) den, die disen brief ansehent lesent oder horent lesen, kund ich Iohans Mayger von Ranwille vnd vergich offenlich mit disem brieue fur mich L fur alle min erben vnd nachkomen, daz ich mit wolbedahtem mut vnd guter vorbetrahtung von dem ersamen Andres Entzziswiller burger L ze sant Gallen den hof gelegen ze Rânwille, den man nempt der Entzziswiller hof, der sin lehen ist von dem erwirdigen gotzhus ze sant Gallen, L mit hus mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit strassen mit wasser mit wasserflussen vnd gengen mit allen rehten vnd mit aller zugehorde reht vnd redlich enphangen han mir vnd allen minen erben frowen alz mannen tohtren als knaben ze ainem rehten staten erbzinslehen vmb ainen staten zins, vnd han im darumb willeklich geben vnd bezalt druzehen phunt vnd zehen schilling phenning guter Costentzzer munse, mit solicher beschaidenhait vnd in dem rehten dinge vnd gedinge, das ich vnd min erben, ob ich enbin, den vorgeschribenn hof ze Ranwille, den man nempt der Entzziswiller hof, mit allen rehten vnd mit allen zugehorde in eran vnd vnwustlich haben niessen vnd buwen sont nach erblehens reht, vnd sol ich vnd min erben vnd nachkomen dem obgenanten Andres Entzziswiller vnd allen sinen erben vnd nachkomen von dem selben hof hinnenhin aller jarlich ie ze sant Gallen tag vier malter vesan vnd ain malter haber alles gutes vnd vngefarliches kornes Byschoffzeller messes vnd vier herbst hunr vnd darnach aller jarlich ie ze dem hailigen abent ze ôstran hundert aiger ze rehtem jarlichem zins ân furzug ân alle minrung vor aller manglichem vnd ân allen iren schaden ze sant Gallen in der stat geben rihten vnd antwurten vnd niht me, welhes jares wir aber daz niht tatint, so hat der obgenant Andres Entzziswiller vnd sin erben vnd nachkomen vnd iro helffer, wer die sint, frijes vrlob vnd vollen gewalt, ie nach den vorgeschribenn ziln, wenne su wellent, mich vnd min erben vnd nachkomen ze phendenn ze notenn ze hefftenn vnd an ze griffenn an vnserm gut ligendem vnd varendem vff dem land vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wa hin su das getun mugent ald in fugklich ist, alz vil vnd alz lang, vntz daz su ie des selben kornes hunr vnd aiger, daz in danne da von vssgestanden vnd niht worden war, vnd des schaden, in den su vnd iro helffer von des selben phendens notens heftens vnd angriffens wegen koment, gantzlich gewert vnd vsgeriht werdent. Ez ist och mit namen beredt vnd bedingot, beschach daz ich oder min erben ald nachkomen dehaines jares von vnseren rehten des vorgeschribenn hofes vnd erblehens gan vnd die verkoffen woltint gantzlich oder in dehainen tail, daz ich danne oder min erben ald nachkomen dem obgenanten Andres Entzziswiller oder sinen erben ald nachkomen die selben vnseru reht des ersten vail bieten vnd vor manglich ze koffenn geben sullen funf schilling phenning guter Costentzzer munse naher dann ieman andre, ob su sie koffen wellent, war aber, daz su si niht koffen woltint ald mohtint, so mugent wir dannenhin die selben vnseru reht wol ze koffenn geben, wem wir wellent, inen an allen iren rehten gantzlich vnschadlich, vnd wem wir och danne die selben vnseru reht ze koffenn gebent, dem selben vnd sinen erben sol och danne der obgenant Andres Entzziswiller oder sin erben ald nachkomen den vorgeschribenn hof ze Ranwille, den man nempt der Entzziswiller, mit aller zugehorde ân furzug vnd ân alle geuarde lihen in dem zins vnd in allen den rehten dinge vnd gedinge, alz er mir in ietz verlihen hat. Des selben glich ist beredt vnd bedingot, beschach daz der obgenant Andres Entzziswiller oder sin erben ald nachkomen dehaines jares von iren rehten des vorgeschribenn hofes ze Ranwille gan vnd die verkoffen woltint gantzlich oder in dehainen tail, so sont mir oder minen erben ald nachkomen die selben iru reht des ersten vail bieten vnd vor manglichem ze koffenn geben och funf schilling phenning guter Costentzzer munse naher dann ieman andre, ob wir si koffen wellent, war aber, daz wir si niht koffen woltint ald mohtint, so mugent su dannenhin die selben iru reht wol ze koffenn geben, wem su wellent, mir vnd allen minen erben vnd nachkomen an allen vnseren rehten gantzlich vnschadlich. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so han ich Iohans Mayger da vorgenant erbetten den ersamen Vlrich Spiesser burger ze sant Gallen, daz er sin insigel fur mich fur alle min erben vnd nachkomen offenlich gehenkt hat an disen brief, vnder des selben insigel ich mich willeklich gebunden han, won ich aigens insigels niht han, des och ich obgenanter Vlrich Spiesser offenlich vergich an disem brief mir vnd alle minen erben gantzlich vnschadlich. Diz beschach vnd ward dirre brief geben ze sant Gallen an sant Johans abent des Toffers ze sunnwendi in dem jar, do man von Cristus geburt zalt druzehenhundert jar, nunzig jar vnd darnach in dem vierden jâre.