Wir diß nachgenemten Niclaus Ruprecht, Vlrich Rudger vnnd Vlrich ab dem Berg pfleger vnnd maister der siechen des spitals ze sant Gallen¹ tugint kunt vnnd verjehent offennlich mit disem brieff fur vns vnnd fur alle vnnser nachkomen allen den, die inn sehent lesen oder horent lesen, von des hofes wegen, den man nemmet Bachi² vnnd ain halb stosset an andern bul vnnd andert an Bruwylle³ vnd belehent ist von dem erwirdigen gotzhuß ze sant Gallen vnnd den die wysen wolbeschaiden Blarer⁴ salig, Johanns Blarer vnnd Johanns Burgower salig wilent pfleger vnnd maister des yetzgedauchten spitale ze sant Gallen dem selben spital vnnd zu des selben spitals hannden mit dem hof, den man nemmet Bruwylle, fur recht aigen koufftent vnnd gekoufft hattent vor zytten von dem ersamen gotzhuß ze Maggenow⁵ vnnd von sinen pflegern, die des do ze denen zytten gewalt hattint, als der brieff⁶ wyst vnnd sait, den der selb spital dar vmb in hentz von dem jetzgedauchten conuent ze Maggenow hat, dz wir des mit samlicher gutter kuntsami erinnrett worden sind, won des egeschribnen conuentes ze Maggenow pfleger dem obgedauchten spital vnnd sinen pflegern den vorgeschribnen hof, den man nemmet Bachi, fur recht aigen nit geuertigen konnden, dz do des selben conuentes pfleger den jetzgedauchten hôf genamt Bachi mit gewer vnnd mit allen rechten vnnd zugehorden vmb die summe geltes, als dem selben hôf angepurt, wider zu des selben gotzhuß vnnd conuentes hannden zugent vnnd koufftent von dem egedauchten spital vnnd von sinen pflegern vnnd siderher vber den selben hof ze tragen gehept habint vnnd nach hannd die wysen wolbeschaiden Johannsen vnnd Hainrichen die Blarer burger ze Costentz, denen die selbe tragerige von erbschafft wegen von iro vatter salgen Gerwigen dem Blarer angeuallen vnd an erstorben ist, vnnd won wir des alles gantzlichen erinret sind worden vnd vnns des erfaren hand, darvmb so haben wir mit ainhellem wolbedachtem mutte vnnd mit ratte vnd von haissens wegen des rattes ze sant Gallen den ersamen in gott frow Elsbethen Gielinen aptissinn des vorgeschribnen conuentes ze Maggenow⁷ vnnd allen ir nachkomen vnd dem selben gotzhuß vnnd conuent vnd ouch sinen vorbenempten tragern den vorgedachten hoff genant Bachi mit grunnd mit grat mit holtz mit veld mit allen rechten nutzen vnd gewonhaiten vnd mit aller zu gehorde vnnd ouch mit aller gewer ledig vnd loß gantzlich vnd gar gelassen vnd sagent och vnd lassent in ledig vnd loß in krafft vnd mit vkunnde dis brieffs in den rechten vnd mit dem geding, dz wir nach vnnser nachkomen, die des vorgeschribnen spitals pfleger jetz sind ald hienach werdint ald sind, dz vorgeschriben conuent vnnd gotzhuß nach dehain sin pfleger nach trager nach niemant von des selben conuentes wegen an dem noch von des vorgeschribnen hoffes wegen, den man nemet Bachi, noch von dehain siner zu gehorde niemer sollent nach wellent ansprechen vftriben bekumberen bekrencken sumen nach ieren noch in dehain wise beschwaren mit luten noch mit brieffen mit gaistlichen noch mit weltlichen gerichte noch on recht noch mit dehainen andren sachen on alle geuarde, doch in den rechten vnnd mit dem gedinge, dz diser brieff vnd dis verzichen dem vorgeschribnen spital vnd sinen pflegern an dem vorgeschribnen hoff, den man nemett Bruwille, an siner gewer an allen sinen rechten nutzen vnnd gewonhaiten gantzlich vnnd gar vnschadlich ist vnd sin sol jetz vnnd hienach vnnd dz der brieff, den sy von dirre vorbenempten beder hoff wegen innehand vmb den vnd von des jetzgedachten hoffes wegen, den man nemet Bruwille, vnnd von aller siner zugehorde gantz krafft vnnd macht sol vnd mag han jetz vnnd hienach mit der gewer mit dem geding vnnd in allen den rechten, als der selbe brieff wiso vnd sait on alle geuarde vnnd dz der selbe brieff vmb dekain sache noch von dekainer sache wegen nit krafftloß noch getodt ist noch sin sol denn allain von des vorgeschribnen hoffes wegen, den man nemet Bachi, vnd siner recht, als da vorgeschriben stat vnd mit worten beschaiden ist, on geuarde. Vnnd ze offnen waren vrkunnde vnd statter sicherhait aller dirre vorgeschribnen dinge vnd vergicht so haben wir vorgenempten Niclos Ruprecht, Vlrich Rudger vnnd Vlrich ab dem Berg pfleger vnnd maister des obgenanten spitals vnnseri vnnd des selben spitals insigel fur vnns vnnd vnnser nachkomen offennlich an disen brieff gehenngcket. Der geben ward ze sant Gallen nach der gepurt Cristi M^oCCC^o vnnd im LXXXXIIII jare, an dem nachsten zinßtag nach sant Petters vnnd sant Pals tag der XII potten.