Allen^a) den, die disen brief ansehent lesent oder horent lesen, kund ich Zimmer Hans von dem Friiendorff¹ vnd vergich offenlich mit disem brieue fur mich fur alle L min erben vnd nachkomen, daz ich mit wolbedahtem mut vnd mit guter vorbetrahtung den korn zehenden von dem vnd ab dem hof ze Gumaswille² ab allem L vnd vsser allem dem, so darzu ald darin gehort, vnd ainhalb stosset an Turra muli³, vnd vier phenning guter Costentzzer munse jarliches vnd ewiges geltes L vnd rehtes zinses von der vnd ab der wisen gelegen ze Gumaswille, die man nempt Altenwis⁴, der selb korn zehend vnd och die vier phenning jarliches geltes min friies aigen waren mit allen rehten nutzzen vnd gewonhaiten vnd mit allen zugehorden, alz ich den selben korn zehenden vnd och die vier phenning geltes biz her vff disen huttigen tag, alz dirre brief ist geben, inne gehebt vnd genossen han, redlich vnd reht aines iemerwerenden staten ewigen koffes verkoft vnd ze koffenn geben han den ersamen Vlrichen Spiesser vnd Iohansen Appaceller maister vnd phleger zu disen ziten der armen veltsiechen ze sant Gallen an dem Linsibul⁵ vnd allen iren nachkomen, weli ie danne da selbs an dem Linsibul der siechen pfleger vnd maister sint, vnd zu der armen veltsiechen an dem Linsibul handen vmb zehen schilling vnd vmb sechs phenning guter Costentzzer munse, dero ich gantzlich vnd gar von in gewert bin vnd enphangen han vnd an minen offenn nutz bewendet, den selben korn zehenden, der da gat von dem vnd ab dem hof ze Gumaswille vnd och die vier phenning jarliches geltes vnd ewiges zinses von der vnd ab der vorgedahten wisen genant Altenwis ich den obgenanten phlegern vnd maistern der siechen an dem Linsibul an der obgenanten siechen vnd ir nachkomen stat an dem Linsibul vnd zu iren handen mit allen rehten vnd zugehorden reht vnd redlich geuertgot vnd braht han, alz reht sitte vnd gewonlich waz vnd alz es kraft vnd maht sol vnd mag han ietz vnd och hie nach. Vnd darumb so han ich mich willeklich verzigen vnd verzich mich mit disem brief gantzlich vnd gar fur mich vnd fur alle min erben des vorgeschribenen korn zehenden ze Gumaswille vnd der vier phenning geltes mit allen rehten vnd mit aller zugehorde aller aigenschaft aller lehenschaft aller kuntschaft alles vszugs aller gewer lut vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben, ob ich enbin, an dem zu dem vnd von des vorgeschribenn korn zehenden vnd och der vier phenning jarliches zins vnd ewiges geltes ie gehebt hant ald hie nach iemer gehaben oder gewinnen mohtint, vnd daz ich noch dehain min erben noch nieman andre an vnser stat noch von vnsern wegen die obgenanten phleger vnd maister der vorgedahten veltsiechen an dem Linsibul noch dehain iro nachkomen darumb niemer sullent noch wellent an sprechen vf triben bekumberren bekrenken noch in kain wis beswaren weder mit gaistlichem noch mit weltlichem geriht noch ân geriht noch mit enkainer lay ander sache ân alle geuarde. Ich han och gelobt mit miner truwe vnd loben mit disem brief fur mich vnd fur alle min erben, des vorgeschribenn korn zehenden vnd och der vier phenning jarliches geltes vnd des koffes reht wer ze sinne nach des landes reht vnd och die obgenanten phleger vnd maister vnd ir nachkomen darumb ze versprechen vnd ze verstanne an allen stetten gen aller manglichem ân allen iren schaden, wenn wa vnd wie dik su des bedurffent ald darumb von ieman angesprochen geschadgot oder vfgetriben werdent mit dem rehten. Vnd des alles ze offem warem vrkunde vnd ze ainer staten sicherhait aller der vorgeschribenn dinge vnd vergiht so han ich Zimmer Hans da vorgenant erbetten den wolbeschaidenn Cunrat Keller von Busenhofen⁶ den korn koffler burger ze sant Gallen, daz er sin insigel fur mich fur alle min erben vnd nachkomen offenlich gehenkt hat an disen brief, vnder des selben insigel ich mich willeklich gebunden han, won ich aigens insigels niht han, des och ich obgenanter Cunrat Keller offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten mantag nach sant Vlrichs tag in dem howat des jares, do man von Cristus geburt zalt druzehenhundert jar, nunzig jâr vnd darnach in dem vierden jare.