Allen^a) den, die disen brief ansehent lesent oder horent lesen, kunden wir Andres Entzziswiller burger ze sant Gallen vnd Anna sin êlichi husfrow Hainrich Hubers salgen êlichi tohter vnd veriehent L offenlich mit disem brief fur vns fur alle vnser erben vnd nachkomen, das wir ansehen vnd angesehen haben die grossen truw vnd danknamen dienst, die vns swester Elzbeth Huberin min der obgenanten L Annen êlichi swester och burgerin ze sant Gallen dik willeklich getan hat vnd noch wol getun mag, besunder daran das si vns ietz ze mal siben phunt phenning guter Costentzzer munse ie zwen L gut vnd geng haller fur ainen Costentzzer phenning frilich vnd ledklich zu vnsern handen geben vnd gewert hat, die selben phenning an vnsern offenn nutz vnd bekert sint, won aber wir si der selben truw vnd guten fruntschaft noch niht erwidert noch ergetzzet hant, darumb so haben wir baidu mit ainberem willen mit wolbedahtem mut vnd guter vorbetrahtung der obgenanten swester Elzbethen Huberinen vnser swester fur vns fur alle vnser erben vnd nachkomen gelobt bi guten truwen ze gebenn vnd lobent ir mit vrkund vnd kraft diz gegenwurtigen brieues nv hinnenhin aller jarlich ain malter guter vnd vngefarlicher vesan Byschoffzeller messes, die ie es selben jares gewachsen sien, ân geuarde von dem vnd vsser dem hof gelegen ze Ranwille, den man nempt der Entzziswiller hof, den Johans Mayger von Ranwille von vns ze ainem erblehen buwet vnd der vnser lehen ist von dem erwirdigen gotzhus ze sant Gallen, ze ainem rehten lipgedinge vnd in lipgedinges wis vnd reht, alle die wile si lebot vnd in lib ist, das selb ain malter guter vesan des vorgeschribenn messes sullent wir vnd alle vnser erben vnd nachkomen vnd och alle die, in dero hant vnd gewalt der vorgeschriben vnser hof ze Ranwille iemer kumpt, der obgenanten swester Elzbethen Huberinen vnser swester hinnenhin aller jarlich ie ze sant Gallen tag ân alle minrung vor aller manglichem ân allen ir schaden vnuerzogenlich geben weren rihten vnd antwurten ze sant Gallen in der stat, in welhes hus si ie danne wil, alle die wile si lebot vnd in lib ist vnd nut furo, doch also daz si das vorgeschriben lipdinge vordren sol zu den ziten, alz vor beschaiden ist. Beschach aber daz niht, welhes jares das war, das die obgenant Elzbeth Huberin vnser swester aller jarlich ie ze sant Gallen tag aines malters guter vnd vngefarlicher vesan Byschoffzeller messes niht gantzlichen gewert vnd vsgeriht wurdi von vns oder von vnseren erben ald nachkomen, so hat die obgenant Elzbeth Huberin vnser swester vnd ir helffer, wer die sint, friies vrlob vnd vollekomen reht vnd gewalt, ie nach dem selben sant Gallen tag, wenn si wil, vns vnd vnser erben vnd nachkomen vnd och alle die, in dero hant vnd gewalt der vorgeschriben vnser hof ze Ranwille ie danne ist ald niessent, ze phendenn ze notenn ze heftenn vnd an ze griffenn an vnserm gut ligendem vnd varendem vff dem land in dorffern vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su daz getun mugent ald in fugklich ist, alz vil vnd alz dik, vntz das si ie des selben aines malters guter vesan des vorgeschribenn messes vnd des schaden, in den si vnd ir helffer von des selben phendens notens heftens vnd angriffens wegen koment, gantzlich gewert vnd vsgeriht wirt, vnd sol vns noch vnser erben noch nachkomen noch dehain vnser gut hie vor noch hie wider niht friden friien schirmen noch gut sin kain vszug noch enkainer lay ander sach behelf noch furzug, so ieman vinden oder erdenken kan, in dehain wise, vnd wenne dann die obgenant Elzbeth Huberin vnser swester von todes wegen abgangen ist, so sol vns vnd vnseren erben vnd nachkomen daz vorgeschriben lipdinge daz ain malter vesan dannenhin gantzlich vnd gar ledig sin vnd los ân aller manglichs ierung vnd widerrede. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so haben wir die vorgenanten Andres Entzziswiller vnd Anna sin elichi husfrow baidu fur vns vnd fur alle vnser erben vnd nachkomen vnseru aigenu insigel offenlich gehenkt an disen brief. Der geben ist ze sant Gallen an dem nahsten mantag nach sant Vlrichs tag im howet des jares, do man von Cristus geburt zalt druzehenhundert jar, nunzig jâr vnd darnach in dem vierden jâre.