Allen^a) den, die disen brieff ansehent lesent oder horent lesen, kund ich Rudolf von Edegswille schulthais ze Wil¹ L von der stozz vnd misshellung wegen, so die ersamen gaistlichen frowen frow Anna von Henkart prioLrin vnd die frowen in der samnung ze Wil ² von ires couents wegen ze ainem tail vnd Johans Korherr L der junger burger ze Wil vnd Hans Muller von Bromshouen³ ze dem andern tail mit ain ander gehebt hant von ains wassergraben wegen, so der ietzgenant Johans Korherr gemachot hatt durch der frowen in der samnung wis vff Wilmatt⁴ gelegen, die vnnan stosset an des gotzhus von sant Gallen wis vnd obnan stosset an Hansen Binders wis, vnd derselb Johans Korherr maint vnd sprach, daz er recht hetti durch dieselben wisen ze wasrent vff sin vnd Hansen Mullers wis, die si koft hettint von Johansen Sennen, vnd aber die priorin vnd die frowen in der samnung sprachent, daz er das nit tun solt, daz si derselben stozz ze baiden tailn vff mich komen sint ze ainem gemainen man vnd die obgenant priorin vnd die frowen dar vmb zu mir ze schidman geben hant Johansen von Arnoltswille⁵ vnd Johans Korherr von sinen vnd von des obgenanten Johansen Mullers sines gemainders wegen, fur den er och do zemal vmb dis sach trost vnd versprach, dar vmb zu mir ze schidman geben hat Vlin Schnetzer vnd mir ze baiden tailn gelobt hant, waz wir drie oder der mertail vnder vns nach baider tail kuntschaft, so si von der sach wegen fur vns bringent, vns erkantent vnd inan vssprachent, daz si daz statt haben vnd dar bi beliben woltent. Da bekenn vnd vergich ich offenlich mit disem brieff, daz ich obgenanter gemainer man vnd die obgenanten schidlut wir alle drie gemainlich nach baider tail kuntschaft, so su fur vns brahtent vnd wir verhortent, vns ainhelleklich erkennet vnd vssgesprochen haben vnd sprechent och mit disem brieff, daz die obgenanten Johans Korherr vnd Johans Muller den obgenanten wassergraben von rechtes wegen durch die obgenant der frowen in der samnung wis nit haben sont vnd och durch noch vber dieselben der frowen wis vff iro obgenant wis von dehaines rechten wegen nutz wasren sont, wan was si dar vber wasrent, daz si daz von minne vnd von kains rechten wegen tun sont, alz vil vnd alz lang inen des die frowen gunnent, vnd nit furbaz. Vnd des ze warem offem vrkund so gib ich obgenanter schulthais gemainer man in dirr sach den obgenanten frowen in der samnung disen brieff von ir vordrung wegen mit minem insigel versigelt mir vnd minen erben vnschadlich. Dar nach veriehen wir obgenanten Johans von Arnoltswille vnd Vli Schnetzer schidlut in dirr sach ain gantz warhait aller vorgeschriben ding vnd daz wir vns dises vorgeschriben spruches ainhelleklich mit dem gemainen man nach baider tail kuntschaft also erkennet haben. Des ze warem vrkund so haben wir och baid vnsri insigel vns vnd vnsern erben vnschadlich offentlich gehenkt an disen brieff. Der geben ist an dem nahsten samstag nach sant Vlrichs tag, do man zalt von Cristus geburt druzehenhundert vnd nuntzig jar, dar nach in dem vierden jar.