Ich^a) Hans Schach fry lantrichter im Clegow¹ an statt mines gnedigen herren graff Hansen von Habspurg² lantgraff im Cleggow tun kunt menlichem mit disem brief, das fur mich kam in offem verbannem lantgericht der fursichtigen wisen L des burgermeisters des raut vnd der burger gemeinlich der statt ze sant Gallen erber gewissnu bottschaft vnd zougten vor mir einen fryheit brief der fryheiten vnd gnaden, so sy hant von dem aller durluchtigosten herren vnd fursten L herr Wentzilaus dem Romschen kunig zu allen ziten merer des richs vnd kunig ze Bechem, der selb fryheit brief gantz geb vnd vngebresthaft wz an bermit vnd an geschrift vnd ouch eigenlich versigelt wz mit der kungglichen magiLstatt anhangendem insigel, vnd stund der vorgedacht fryheit brief von wort ze wort geschriben also: Es folgt der Text von Nr.5655. Vnd do der vorgeschriben fryheit brief vor mir an offem lantgericht offenlich gelesen vnd verhort wart, do battent die botten der obgenanten statt ze sant Gallen, das ich vorgenanter lantrichter dem burgermeister dem raut vnd den burgern gemeinlich der selben statt zu sant Gallen des vorgedachten irs freyheitz briefs ein abgeschrift geb, die man nempt ein vidimus, vnder des egenanten lantgerichtz in Cleggow anhangendem insigel, die selb abgeschrift genant ein vydimus wart ouch den botten der vorgenanten statt ze sant Gallen nach miner frag vff den eid erteilt ze geben. Vnd des ze warem vnd offem vrkund aller vorgeschriben ding so han ich der obgenant lantrichter des lantgerichtz in Cleggow insigel offenlich gehenkt an disen brief. Der mit vrteild geben wart ze dem Langenstein³ vff dem lantag an der nechsten mitwuchen nach aller heilgen tag, do man zalt von Cristus geburt druzechenhundert vnd nuntzig jar vnd dar nach in dem vierden jar.