Allen, die disen brieff an sehent oder horent lesen, kunden wir Jacob Swartz vnd Johans von Tettikoffen¹ von L Costentz vnd vergehent des offenlich mit disem brieff von des koffes wegen, alz der wolbeschaiden Hainrich L Cristan burger ze Costentz gekofft hett vmb die edelln wolerbornen herren graff Albrechten von Werdenberg L herren ze dem Hailgenberg², graff Rudolffen vnd graff Hugen gebruder von Werdenberg³ hren^a) ze Rineg geuettern hundert pfunt guter haller ewiges geltz vmb funfftzechen hundert pfunt guter haller vff ainen widerkoff, halb funfftzig pfunt haller vff sant Johans tag des Thoffers vnd halb funfftzig pfunt guter haller vff sant Martins tag ze gebent, alz der brieff wist vnd seit, der dar vber besigelt geben ist, vnd dar vmb burg gewesen sint mit anderen burgen Hainrich salig Hartzer vnd Rudolff salig Hartzer gebruder von Costentz. Vnd won die selben Hartzer abgangen sint von todes wegen, da sigent wir von bett wegen der obgenanten herren von Werdenberg des selben Hainrichz Cristans vnd des erben vmb dz obgenant jarlich gelt an der obgenanten Hartzer salgen statt burg worden vnd habent och baid gesworn vnser jeglicher besunder ainen gelerten aid ze den hailgen ze laistent vnd verbindent vns och des mit disem brieff, alles des ze vollefurent vnd ze tund, des sich die obgenanten Hartzer salgen verbunden hatten vnd alz des selben Hainrichs Cristans hoptbrieff wist vnd seit. Vnd des alles ze warem vnd offem vrkunt aller dirre ding gebent wir die obgenanten Jacob Swartz vnd Johans von Tettikoffen vnseru insigell an disen brieff. Der ist ze Costentz geben, do man von Cristes geburt zalt drutzechen hundert jar, darnach in dem funff vnd nuntzigesten jar, ze ingandem mertzen.