Wir^a) Cun von gottes gnaden abt des gotzhus ze sant Gallen¹, dz an alles mittel zugehort dem stul ze Rome, sant Benedicten ordens in Costentzer bistumm gelegen tun kund L vnd ze wissent allermenglichem mit disem brief, dz fur vns kam der from vest Hainrich von Altstetten², den man nemmet Kilchhêrr, vnsers gotzhus lieber dienstman vnd gab L do letklich vnd frilich disu nachgeschribnen guter, die er von vns vnd vnserm gotzhus ze sant Gallen ze lehen hatt, mit allen rehten gewonhaiten vnd zugehorden vf an vnser L hand, item den halben tail vnd sini reht des kornzehenden vff der Hohi³ ob Altstetten gelegen, der halber der frowen in der samnung ze Altstetten⁴ ist, item den wingarten an dem Kesselbach⁵ gelegen mit dem torggel, der darzu gehort, item den hof, den man wilunt nemmet Enkenwilr⁶ vnd wilund zum Bul⁷ mit holtz mit veld mit grund mit grat buwt Vli von Enkenwilr vnd giltet jarlich ain pfund pfenning zwen gut geng haller fur ainen pfenning ainen kloben werchs dru herbst hunr vnd funffzig ayer, item des Schlupfen muli gelegen ze Altstetten bi der statt, item ainen bomgarten gelegen vnder der statt Altstetten, den man nemt des Ffrolichs bongart, item ffunffzehen schilling pfenning zwen gut geng haller fur ainen Costentzer pfenning jarlichs geltes, die man nemmet hofstat pfenning, ab vnd von zwain gassen in der stat Altstetten gelegen, item ain halbu juchart akkers gelegen in dem Bruchlin⁸, item ain halb juchart akkers gelegen in dem Nidrenveld⁸. Vnd batt vns do flissklich vnd ernstlich, daz wir im gnad tatind vnd im die vorgenamten guter allu mit allen zugehorden wider luhin ze lipgeding vnd in lipgedinges wîs vnd rehten, mit der beschaidenhait, daz er dieselben guter haben vnd niessen vnd besetzen vnd entsetzen solt vnd moht ze end sinr wil, vnd wenne er denn abgieng vnd enwar von todes wegen, dz denne der obgedaht halb kornzehent vff der Hohi ob Altstetten gelegen got ze lob vnd durch siner vordren vnd nachkomen selan trost vnd hailes willen an sant Gallen kappell vnd allu andru vorgeschribnen stuk vnd guter an sant Othmars altar in sant Othmars munster ze sant Gallen⁹ gelegen vallen vnd den priestern, die da messe hand vnd gottes dienst volbringent, werden soltin vnd vollangen. Do erhorten wir sin ernstklich bett genadeklich vnd luhent im alli vorgenampten stuk vnd guter wider vnd tâten im die gnad vnd tum im si och mit kraft vnd vrkund diss briefs, daz er dieselben guter besetzen vnd entsetzen vnd in lipgedings wîs^b) vnd rehten ze end sinr wil haben vnd niessen sol vnd mag, vnd wenne er abgât vnd enist von todes wegen, dz danne die vorgenanten guter mit allen iren zugehorden vallen vnd komen sond an die stett, als vor erzellet vnd geordnet ist an disem brief. Vnd ze offem warem vrkund aller vorgeschribner ding haben wir abt Cun da obgenant vnser insigel offenlich gehenkt an disen brief. Darnach vergih ich egenampter Hainrich von Altstetten ain gantz warhait alles des, so der erwirdig ffurst vnd min genadiger herr abt Cun da obgenant von mir veriehen hât an disem brief, vnd ze merer sicherhait derselben ding han ich min aigen insigel fur mich vnd all min erben vnd nachkomen offenlich gehenkt an disen brief vnd han dar zu erbetten minen lieben vettern Eglolffen von Altstetten den eltern¹⁰, dz er sin insigel ze ainer noch meren gezuknust vnd vrkund aller vorgeschribner ding gehenket hat an disen brief, des och ich ietzgenamter Eglolff von Altstetten offenlich vergih an disem brief doch mir vnd allen minen erben gantzlich vnschadlich. Dis beschah vnd ward dirre brief geben ze sant Gallen an dem nahsten mantag vor aller hailgen tag in dem jar, do man zalt von gottes geburt tusent druhundert nuntzg vnd ffunff jare.