Wir^a) graff Tonat von Tokkenburg¹ veriehen vnd tunt kunt allermenglichem mit disem brief, daz fur vns kam der from Amar von Luterberg² ze LiehLtenstaig³ in vnser statt vff den tag, alz dirr brief geben ist, vnd offnot vor vns vnd sprach, daz er mit guter vorbetrahtung vnd beschaidenLhait von siner kumberhafti wegen redlich vnd recht fur sich vnd fur alle sin erben ains vngeuarlichen iemerwerenden redlichen koffes verkoft L hetti funf mut kernen vnd zwai malter habern gutes vnd genames Wiler⁴ messes alles iarliches states vssgendes ewiges geltes vnd zinses ab vnd vsser dem hof ze Sirnach⁵ in dem Oberndorf⁶ gelegen, den man nempt Luterbergs hub, vnd sinem zehenden ze Sirnach mit allen rechten nutzen gewonhaiten vnd von vnd vsser allem dem, so in oder zu demselben hof vnd zehenden an dehainen dingen iendert gehort, derselb hof vnd der zehend sin lehen von vns warent, vnd hetti ze koffent geben dem erbern fromen Cunraten von Eppenberg⁷, der och do vor vns zegegen stund, vnd allen sinen erben vmb funftzig pfund pfen(nning) alles guter vnd genamer Costentzer muns, dero er och aller gantzlich vnd gar nach sinem nutz vnd willen von im war bezalt. Vnd war der kof geschehen mit solicher gedingd beschaidenhait vnd in dem rechten, daz der egenant Amar von Luterberg vnd, so er enist, alle sin erben vnd alle, in der hand vnd gewalt der obgenant hof vnd der zehend iemermer koment buwent niessent oder inne hant, dem egenanten Cunraten von Eppenberg oder, so er enist, sinen erben nu hinnanhin iarklich vnd iemermer ewenklich ie ze sant Martis tag die vorgeschribnen funf mut kernen vnd zwai malter habern gutes vngeuarliches genges vnd genames Wiler messes ab von vnd vsser dem obgenanten hof vnd zehenden von allen rechten nutzen zinsen gewonhaiten vnd von allen zugehorden desselben hofs vnd zehenden vor ab vor vzz vnd vor allermenglichem an allen abgang vnd mindrung geben vnd vnuerzogenlich weren vnd ain mil wegs verr von Sirnach, welhes wegs vnd in welhes hus si went, vertgen vnd an allen iren schaden antwurten soltent an allen furzug vnd widerred an geuard. Beschach aber dehaines iares, daz dem egenanten Cunraten von Eppenberg oder sinen erben der vorgeschriben zins an kernen vnd an haber nit gantzlich vff sant Martis tag wurt vssgericht vnd bezalt, alz vor beschaiden ist, von welherlai sach ald gebresten sich daz fugti, so hat derselb Cunrat von Eppenberg vnd alle sin erben dar nach allweg, alz dik so es ze schulden kumpt, vollen gewalt vnd recht, den obgenanten hof vnd den zehenden mit aller zugehord selber ze niessent ze uerlihent ze besetzent vnd entsetzent alz ir aigenlich gut alz vil alz dik vnd alz lang, vntz daz si allweg also dar mit ires versessnen vnd vngewerten zinses an kernen vnd an habern vnd alles des schaden, den si dar von enpfahent, gantzlich an ir schaden vssgericht vnd bezalt werdent, dar an si och der obgenant Amar von Luterberg noch dehain sin erben noch nieman andrer, in des hand vnd gewalt derselb hof vnd zehend iemermer kumpt buwent niessent ald inne hant in dehain wis noch weg nut sumen noch ierren sont an geuard. Vnd nach der offnung vnd vergicht gab vns do zestett der obgenant Amar von Luterberg wissentklich vnd wolbedaht die obgeschriben funf mut kernen vnd zwai malter haber iarliches ewiges vssgendes zinses vnd geltes ab vnd vsser dem obgenanten hof vnd zehenden mit aller zugehord ledklich vff an vnser hand vnd batt vns ernstlich, daz wir daz ze rechtem lehen vnd ze gemaind in aller vorgeschribnen wis vnd bedingnust lihen woltent dem obgenanten Cunraten von Eppenberg vnd Adelhaiten siner elichen wirtennen wilent Albrehts salgen von Ainwille⁸ elichen tohter vnd allen iren elichen kinden knaben vnd tohtran, die si zwai ietz bi ainander hânt oder hienach bi ainander gewinnent. Dar vmb erhorten wir do gnadklich sin ernstlich bett vnd lihent do zestett wissentklich vnd wolbedaht vnd lihent ôch redlich vnd recht mit disem brief den obgenanten Cunraten von Eppenberg, Adelhaiten siner elichen wirtennen vnd allen iren elichen kinden knaben vnd tohtran, die si ietz bi ainander hant oder hie nach bi ainander gewinnent, inen allen gemainlich vnd vnuerschaidenlich die vorgeschribnen funf mut kernen vnd zway malter habern gutes vnd genames Wiler messes iarliches vssgendes zinses vnd geltz ab vnd vsser dem obgenanten hof vnd vsser dem obgenanten zehenden mit allem dem, so zu dem hof oder zu dem zehenden iendert gehort, in aller vorgeschribnen wîs vnd bedingnust ze rechtem lehen vnd ze rechter gemaind vnd in lehens vnd gemaind wîs an geuard, vnd och also, daz die obgenant Adelhait von Eppenberg vnd alle ir elich tohtran, die si bi dem obgenanten irem elichen man ietzo hat oder hie nach gewinnet, dasselb iarlich gelt an kernen vnd an haber von besundren gnaden vnd von des volkomnen manrechts wegen, so wir inen hier uber getan vnd geben haben, an allermenglichs sumen in lehens wis inne haben vnd niessen sont in glicher wis vnd in allem rechten, alz ob si man oder knaben warent, an geuard. Vnd verzech sich och do wissentklich vnd wolbedaht vor vns der obgenant Amar von Luterberg vnd verzichet sich vnd entwert sich och redlich vnd recht mit disem brief fur sich vnd fur alle sin erben an dem obgeschriben kernen vnd haber gelt mit aller zugehort aller aigenschaft aller lehenschaft aller manschaft aller gewer aller kuntschaft aller zugnust lut vnd briefen alles rechten gaistlichs vnd weltlichs gerichts aller vordrung vnd ansprach vnd aller andren sachen furzug vnd geuarden, dar mit er oder sin erben oder ieman andrer von iro wegen daz vorgeschriben kernen vnd haber gelt in dehain wis iemermer kundent oder mohtent angesprechen oder dar mit si wider disen kof vnd brief kundent oder mohtent gereden oder getun oder schaffen getan, an geuard. Vnd des alles ze offem vrkund der warhait so haben obgenanter graff Tonat von Tokkenburg vnser insigel offenlich gehenkt an disen brief. Dar nach vergich ich Amar von Luterberg da obgenant offenlich mit disem brief fur mich vnd fur alle min erben ain gantz vest sicher warhait aller vorgeschribnen ding, so der wolerborn min gnadiger herr graff Tonat von Tokkenburg von mir veriehen hat an disem brief, vnd han och wissentklich gelobt vnd loben redlich vnd recht mit disem brief fur mich vnd fur alle min erben, die ich vestenklich her zu bind, des obgenanten kernen vnd habern iarlichs gelts ab vnd vsser dem obgenanten hof vnd zehenden mit aller zugehord vnd dis redlichen kofs in aller wis vnd bedingnust, alz vor beschaiden ist, des obgenanten Cunrats von Eppenberg vnd siner erben gen allermenglichem vff gaistlichen vnd vff weltlichen gerichten, wenn wa oder wie dik sy des noturftig sint oder dar vmb mit dem rechten von ieman vffgetriben oder angesprochen wurdent, recht weren ze sint nach dem rechten vnd nach des landes sitten vnd gewonhait an widerred luterlich an geuard. Vnd des alles ze warem vrkund vnd noch merer sicherhait so han ich och min aigen insigel offenlich gehenkt an disen brief. Der geben ist ze Liehtenstaig in der statt an der nahsten mitwochen nach sant Andres des hailgen zwelfbotten tag, do man zalt von Cristi geburt druzehenhundert vnd nuntzig iar, dar nach in dem funften jar.