Allen^a) den, die disen brief ansehent oder horent lesen, kund ich Herman Kupferschmid der elter burger ze Wil¹ vnd vergich offenlich mit L disem brief fur mich vnd fur alle min erben, daz ich von dem hohwirdigen fursten minem gnadigen herren abt Cunen von gottes L gnaden des gotzhus ze sant Gallen² an barem gelt ingenomen vnd enpfangen han nunzehen pfund guter vnd genamer CostenLtzer muns ie zwen haller fur ainen pfen(ning), dero ich aller gantzlich vnd gar nach minem nutz vnd willen von im bezalt bin, vnd han im vnd sinen nachkomen zu des obgenanten sines gotzhus handen vnd gewalt fur mich vnd fur alle min erben dar vmb aines ewigen kofs ze koffent geben ainen akker vff Wiler feld³ vnder sant Peters⁴ kilchof gelegen, der ainhalb stosset an des obgenanten mins herren wisen, die etwenn der von Littenhaid⁵ waz, vnd anderthalb stosset an des grossen hofs akker, der^b) selb akker min recht aigen gewesen ist vnd den ich vormalz koft han von Haintzlin Risen von Costentz, item ainen akker zwischan mines herren von sant Gallen da obgenant wingarten vnd des grossen hofs akker an dem fusweg gelegen, derselb akker halber min recht aigen vnd halber min lehen von dem obgenanten gotzhus ze sant Gallen gewesen ist, mit^c) allen rechten nutzen gewonhaiten vnd mit aller zugehord. Vnd han den ietzgenanten akker halben, der min lehen waz von dem gotzhus ze sant Gallen, ledklich vnd frilich vffgeben an des obgenanten abt Cunen mines gnadigen herren hand, vnd han den andren halbtail desselben akkers vnd och den obgenanten akker vnder sant Peters kilchof gelegen allen fur recht aigen zu desselben mines gnadigen herren abt Cunen vnd zu siner nachkomen vnd zu des obgenanten sines gotzhus handen vnd gewalt braht vnd geuertget vnd si der in nutzlich gewer gesetzt, alz recht sitt vnd gewonlich waz vnd alz daz billich vnd von recht kraft hat nu vnd hernach. Vnd han mich hier vber an denselben zwain akkern mit aller zugehord an dem aigen vnd an dem lehen ledklich vnd frilich verzigen vnd entwert gegen dem obgenanten minem gnadigen herren sinen nachkomen vnd gegen dem obgenanten sinem gotzhus vnd verzich vnd entwer mich och redlich vnd recht mit disem brief fur mich vnd fur alle min erben aller aigenschaft aller lehenschaft aller manschaft aller gewer aller kuntschaft aller zugnust lut vnd brief alles rechten aller rechtung vordrung vnd ansprach, so ich oder min erben zu denselben akkern ie gehatten oder hie nach iemermer gewinnen mohtent von dehainerlay sach wegen, so ieman erdenken kan, an geuard. Ich sol vnd geloben och vestenklich mit disem brief fur mich vnd fur alle min erben, der obgenanten zwaiger akker mit aller zugehord vnd dis kofs des obgenanten mines gnadigen herren abt Cunen siner nachkomen vnd sines obgenanten gotzhus ze sant Gallen gen allermenglichem allenthalben, wenn wa vnd wie dik si des noturftig sint vnd dar vmb mit dem rechten von ieman angesprochen werdent, recht weren ze sint des aigens nach aigens recht vnd des lehens nach lehens recht vnd nach des landes sitten vnd gewonhait an geuard. Vnd des alles ze warer staten sicherhait so han ich obgenanter Herman Kupferschmid der elter min insigel fur mich vnd alle min erben offenlich gehenkt an disen brief. Der geben ist ze Wil an sant Niclaus aubent, do man zalt von Cristi geburt druzehenhundert vnd nuntzig iar, dar dach^d) in dem funften iar.