Den fursichtigen wysen wolbeschaidenn luten dem burgermaister den raten vnd L burgern allen gemainlich der statt ze sant Gallen enbut ich Diethegen von L Marmels ritter minen dienst vor vnd tun vwer wyshait ze wissent, als ich Rudinn L vnd Hansen die Kumber nv aigenlich beheppt han vnd su mir vnd minem bruder Hansen¹ als iren rechten erpplichen herren gehuldet vnd geschworn hand, das su sich da ietz ze Veltkilch mit vns baiden nach vnserm willen gesetzt hand, also das wir inen erloubt habint vnd ôch willeklich gunnen wellint, du nachsten funf kunfftigen jar nach dat dis briefs by vch ze sant Gallen inn ze sitzzent, bitt ich vwer fruntschafft vnd beschaidenhait gar flyssklich mit allem ernst an min vnd mins bruders statt, das ir vch die selben vnser aigen lut fruntlich lassint enpfolhen sin vnd su och gutlich vnd beschaidenlich by vch lassint wonen iemer durch vnser dienst willen. Geben versigelt mit minem aigenn insigel ze end dirr geschrifft vffgedrukkt an dem nachsten donstag nâch sant Niclaus tag anno LXXXX^mo quinto.