Allen^a) den, die disen brief ansehent lesent oder horent lesen, kund ich Hainrich Borhuser hofLamman ze Wil¹ des hohwirdigen fursten mines gnadigen herren abt Cunen von gottes gnaden L des gotzhus ze sant Gallen² vnd vergich offenlich mit disem brief, daz fur mich kam ze Amptenzell³ L in dem hof in offen gericht vff hut disen tag, alz dirr brief geben ist, do ich an desselben mins herren statt mit vollem gewalt offenlich ze gericht sazz, der erber man Johans Karrer von Rudenwille⁴ vnd offnot da mit sinem fursprechen vnd sprach, daz er Machthilten sin elichen wirtennen .. des Lubers elichen tohter, die och do vor gericht zegegen stund, ze rechten gemainderinen vnd erbgnossen annemen vnd enphahen wolt vber sinen tail vnd vber alle die rechtungen, die er iendert hetti an dem zehenden ze Gabras⁵, den man nempt der Karrer zehend, derselb zehend lehen ware von dem obgenanten minem herren vnd von sinem gotzhus vnd vber denselben zehenden Cuni Keller von Mos⁶ Vlis Kellers salgen sun sin gemainder ware, derselb sin gemainder och do in dem gericht zegegen stund. Vnd batt mich im an ainer vrtail eruarn, wie er daz tun solt, alz recht war. Vnd do wart nach miner frag mit gemainer vrtail ertailt, daz der obgenant Johans Karrer sinen tail vnd sinu rechtung an dem obgenanten zehenden mit des egenanten sines gemainders willen vffgeben solti an des gerichtes stab, vnd daz er vnd die obgenant Machthilt sin elichi wirtenn dann baidi gemainlich denselben sinen tail vnd sinu rechtung des obgenanten zehenden wider von dem stab ze lehen vnd ze gemaind enpfahen soltent, vnd daz dieselb gemaind vnd erbgnosschaft dann also wol kraft habi nach dem rechten nu vnd hie nach. Vnd also tett och do derselb Johans Karrer, alz im ertailt waz, vnd gab mit gunst vnd willen des obgenanten sins gemainders sinen tail vnd alli sinu recht an dem obgenanten zehenden mit aller zugehord ledklich vff an des gerichtes stab vnd enphiengent er vnd die obgenant Mechthilt sin elichi wirtenn do ze stett baidi gemainlich von des gerichtes stab die obgedahten recht vnd tail, die er vormalz an dem obgenanten zehenden gehebt hatt, ze lehen vnd ze gemaind, vnd namen ainander baidi dar vber ze rechten gemaindern vnd erbgnossen mit des obgenanten Cunis Kellers von Mos gunst vnd willen, den er do och offenlich in gericht dar zu gab, alz recht sitt vnd gewonlich waz vnd alz dis alles nach miner frag mit gemainer vrtail ertailt wart, doch dem obgenanten minem gnadigen herren sinen nachkomen vnd sinem gotzhus an allen iren nutzen zinsen rechten vnd guten gewonhaiten gantzlich vnschadlich an geuard. Vnd des alles ze offemm vrkund der warhait so han ich obgenempter hofamman min insigel von des gerichtes wegen offenlich gehenkt an disen brief. Der geben ist mit rechter vrtail an dem nahsten samstag nach sant Hylarien tag, do man zalt von Cristi geburt druzehenhundert vnd nuntzig jar, dar nach in dem sehsten jar.