Wir Gotfrid von gottes verhengnischt abt vnd der convent gemeinlich des gotzhuses ze Ruti¹ des ordens von Premonsträt in Costantzer bystum kunden vnd veriehen offenlich mit disem brieff allen, die in ansehent oder hörent lesen, das wir mit guter vorbetrachtung recht vnd redlich ze koffen geben hand dem erbern Vlin Ernin von Bollingen^a)2 vnd sinen erben dz zehendli, dz ierlich gevallen möcht von dem riet genant in Hermans Mos³ in Bollinger wald, dz er wilent geköft hät von dem kloster ze Wurmspach⁴, vnd haben im vnd sinen erben das selb riet also gefrytt, daß sy fürbas keinen zehenden vns noch der kirchen ze Bollingen, die vnsers gotzhuß ist, nit gebunden syen jemerme ze geben oder ze richtend, vnd haben hiervmmb von demselben Vlin Ernin benamzet zehen pfunt phenning Zuricher muntz, dero wir ôch von im gentzlich vnd gar bezalt vnd gewert syen vnd die wir in vnsers des obgenanten gotzhuß schinbaren nutz gekert haben, vnd haben vns hiervmb für vns aller vnsern nachkomen enzigen vnd enzigen vns mit disem brieff aller der vordrung vnd ansprach, so wir zu dem obgenanten zehendlin imer me gehaben möchtin in dehein wiße. Vnd des alles ze einem offnen vnd waren vrkund so haben wir die obgenanten abt vnd couent vnsru insigel offenlich gehenkt an disen brieff. Der geben ist in dem vorgenanten gotzhus ze Rutj an sant Hylarientag des heiligen byschofs, do man zelt von Cristi geburt tuseng druhundert vnd nuntzig jar, darnach in dem sechsten jar.