Reverendo in Christo patri et domino domino Burkardo dei gracia episcopo Constan(ciensi)¹ Vlricus Burgower² presbiter rector parrochialis ecclesie in Gossow³ vestre Const(anciensis) dyocesis reverenciam in omnibus tam debitam quam condignam. Noverit vestra reverenda paternitas, quia testante apostolo omnes stabimus ante tribunal Christi recepturi, prout gessimus in corpore, sive bonum sive malum fuerit, nosque oportet diem messionis extreme bonis operibus prevenire ac eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, ille namque, qui in benedictionibus seminat, de benedictionibus et metet vitam eternam, quod ego hec anxie considerans et perpendens ac secundum ea procedere cupiens et propterea et ob remmedium et salutem mee et progenitorum meorum ac aliorum in recommendatorum animarum ad laudem omnipotentis dei et gloriosissime virginis Marie ac tocius milicie celestis exercitus pro divini cultus augmento in predicta parrochiali ecclesia Gossow de patronatu monasterii sancti Galli ordinis sancti Benedicti dicte vestre dyocesis existente de consensu venerabilis in Christo patris domini Cunonis dei gracia abbatis⁴ necnon conventus seu capptuli dicti monasterii sancti Galli unius misse perpetuam celebrationem in altari sancte Katherine virginis et martiris in ipsa ecclesia Gossow syto et nondum aliquibus redditibus dotato fundavi et erexi ipsum quoque altare cum decima omnium cresentium in banno ville Waltkilch⁵ prope opidum Episcopaliszell⁶ dicte vestre dyocesis cum omnibus suis iuribus et pertinenciis per me pro quadringentis libris denariorum haln. comparata ac prato meo in villa Gossow syto, quod contiguatur ecclesie parrochiali predicte et dicitur fulgaliter des Maigers wis, eciam cum omnibus suis iuribus et pertinenciis per me quinquaginta libris dictorum denariorum haln. comparato datavi et doto per presentes tamen cum modis formis et condicionibus subscriptis, fidelicet quod ipsum altare deinceps in evum perpetuum ecclesiasticum beneficium esse debeat et existat, item quod quilibet cappellanus ipsi altari preficiendus deinceps singulis septimanis, nisi fuerit racionabiliter impeditus, in ipso altari sex celebret missas fidelicet tres pro defunctis et specialiter ipsius misse fundatoribus et benefactoribus universis et reliquas tres de tempore, prout expediens fuerit, et huiusmodi missas mane celebret, ut laboratores post missam possint ire tempestive ad laboram dyurnum, item quod omnia et singula in huiusmodi missa et hora misse oblata sacrificata et undecumque super altare vel alias in ecclesia ubicumque racione et hora misse donata in toto cedere debent plebono seu rectori dicte ecclesie pro tempore existenti, quitquid autem aliis horis et in quacumque loco ipsi cappellano a Christi fidelibus libere datur, hoc ipse cappellanus recipere et sibi licite retinere potest et debet, si vero in diebus festivis vel cum honesta funera presencialiter sunt in ecclesia parrochiali predicta, plebano seu rectori ipsius ecclesie videretur utile expediens vel honestum, quod ipse cappelanus non mane sed infra publicam missam suam celebret missam, tunc ipse capellanus super hoc per dictum rectorem seu plebanum requisitus et rogatus dictam suam missam infra publicam missam celebrare debet et tenetur, et quocienscumque ipse cappellanus sic per dictum plebanum seu rectorem requisitus et rogatus suam missam infra dictam publicam missam celebrabit, medietas omnium oblacionum conparacionum et sacrificiorum undecumque et qualitercumque ad missam eius proveniencium ipsi cappellano cedere debet et huiusmodi misse omni hora ipse plebanus seu rector providere debet in luminibus hostiis vino et ministrante honeste, item quod rector seu plebanus dicte ecclesie pro tempore existens nichil habet debet seu potest cappellano predicti altaris in quocumque facto spirituali seu seculari percipere nec mandare nec ipse cappellanus ipsi rectori seu plebano in quocumque subesse debet, sed omnino debet esse divisus et liber ab eis et utriusque eorum serviciis et preceptis, hoc excepto, quod in diebus festivis et alias quandocumque in dicta parrochiali ecclesia rector seu plebanus vellent cantare aliquid divinum officium publice, tunc cappellanus dicti altaris debet interesse et coadiuvare pro posse dolo et fraude in hiis et in aliis penitus semotis, ita tamen, quod per hoc ipse cappellanus non impediatur, quominus complere valeat suas missas loco et tempore predictis, nisi necessitas magna, que legem non habet, instaret, tunc debet et potest ipse cappellanus necessitate durante dumtaxat subditis dicte parrochialis ecclesie subvenire in divinis et ecclesiasticis sacramentis, et quidquid in hiis et in aliis a Christi fidelibus ipsi cappellano datur vel offeretur in ecclesia extra missam vel extra ecclesiam tempore quocumque, hoc totum cedere debet ipsius altaris cappellano pro tempore existenti absque cuiuslibet contradictione, ut ex hoc ostendatur, quod qui est laboris socius, fiat et consolacionis sine tamen omni alio ipsius parrochialis ecclesie preiudicio. Item quod decedente cappellano ipsius altaris, qui tunc fuerit, ex morte, qui testamentum nullum fecit, qui tamen bene potest condere testamentum, sanus vel infirmus, etiam si in illa moriatur infirmitate, libere cui wlt de omnibus bonis, que vel hereditate vel alio iusto titulo ab amicis vel alias ad eum quomodolibet devenerunt, ubicumque vel quandocumque vel que idem cappellanus habuit, antequam ad eandem devenerit prebendam dumtaxat, tunc omnia per eum derelicta in quocumque et in quibuscumque consistant, que sic nulli nec sanus nec infirmitate porrectus tradidit seu dedit seu que sic, ut predictum est, ad eum non devenerunt nec ipse ea, antequam veniret ad predictam prebendam, habuit, cedant et integraliter cedere debeant altari predicto ad eius usus dumtaxat nullo contradicente convertenda. Item quod iuspatronatus dicti altaris seu cappellani ad ipsum presentacio ad abbatem predicti monasterii sancti Galli pro tempore existentem pleno iure pertineat. Item quod nullus alter quam actu sacerdos ad ipsum altare, quocienscumque ipsum vacare contigerit, presentetur vel in ipso altari pro cappellano instituatur, quodque ipse cappellanus sic instituendus in loco dicti beneficii personalem faciat residentiam et quod nullum aliud beneficium ecclesiasticum cum ipso altari possit seu debeat obtinere. Et ideo supplico vestre paternitati reverende per presentes, quatenus fundationem et dotacionem per me, ut premittitur, factas et cum modis formis et condicionibus antescriptis auctoritate vestra ordinaria approbare auctorizare et confirmare dignemini divine pietatis intuitu et huiusmodi mee supplicationis ob respectum. In quorum omnium testimonium sigillum meum proprium presentibus appendi. Datum in villa Gossow anno domini millesimo trecentesimo nonagesimo sexto, XVI^a kln. februarii, indictione quarta.