Wir^a) Cun von der genâd gottes abt des erwirdigen gotzhus ze sant Gallen¹ sant Benedicten ordens in L Costentzer bystum gelêgen, der an alles mittel vndertanig ist dem stul ze Rôm, vrkunden vnd vergenhent offenlich mit L disem brief vnd tugent kunt allen den, die disen brief an senhent lesent oder horent lêsen ietz vnd ymmer mer hie L nach, daz fur vns kam vff den tag, als dirr brief gêben vnd geschriben ist, vff vnser pfallentz ze sant Gallen der frôm vest her Berhtolt vom Stain ritter ze Marhtal gesêssen vnd offnet vnd sait vns da, wie daz er von redlicher sach wêgen fur rehtu aignu vnuerkummertu guter aines staten redlichen vnd ewigen kôfs ze kôffent gêben hette den erwirdigen gaistlichen herren dem probst vnd dem conuent gemainlich des gotzhus ze Marhtal des ordens von Premonstray ôch in Costentzer bystum gelegen vnd allen iren nachkomenden an iro vnd ires vorbenempten gotzhus ze Marhtal gemainen nutz allu sinu guter ze Rutlingen dem dorf by dem Bussen gelêgen, dero ain tail ietz buwet vnd inne hât Cuntz Ratich, ain tail Hans der alt Schmid, ain tail der Kôfman vnd ain tail ietz buwet vnd inne hât Hans der Schmid der jung, vnd ôch dar zu das holtz, daz man nempt den Zwikenbuhel zwischent dem buhel vnd dem gesprait gelêgen, du guter allu mit allen iren rehten nutzen gewonhaiten vnd zu gehorden an luten vnd an guten nutzit dar an vssgenomen, das ôch alles herr Hans vom Stain² salig ritter sin any vormâls erkôft hêtt vmb den langen Vogt Ernsten saligen, vnd du selben vorgesch(riben) holtzer lut vnd guter mit allen iren rehten vnd zu gehorden allu von vns vnd von vnserm vorbenempten gotzhus ze sant Gallen ze lehen giengent vnd von vns lehen warent, vnd wan die vorbenempten gaistlichen herren des gotzhus ze Marhtal vnd ôch ir gotzhus von rehtz wêgen solichu lehen nit haben soltent noch enmohtent, do batt vns do ze mâl der vorg(enant) her Berhtolt vom Stain ritter mit ernst, daz wir den vorbenempten herren ze Marhtal iren nachkomenden vnd ôch irem gotzhus daz vorbenempt holtz die lut vnd guter mit allen iren rehten vnd zu gehorden geruchtent ze aigent durch gottes willen vnd ôch vnsern guten willen vnd gunst dar zu gabent, so welt er gêrn an der selben vorbenempten holtzer lut vnd guter stat disu hie nachgesch(riben) sinu aigenn guter ze Têppenhusen gelêgen mit iren zu gehorden gen vns vnsern nachkomenden vnd gen vnserm vorbenempten gotzhus ze sant Gallen ze lehen machen, also daz er vnd sin erben vnd nachkomenden sy nun furo ymmer mer hie nach von vns vnd vnsern nachkomenden ze lehent enpfahen soltent vnd weltent an der vorbenempten holtzer lut vnd guter stat ze Rutlingen nach lehens reht, wan sy doch vast besser vnd fur trêffender warent denn du vorbenempten lut holtzer vnd guter ze Rutlingen gelegen, als vor beschaiden ist. Vnd sint diss du guter ze Teppenhusen gelegen. Item der hof, den Boltzly ietz buwet, item der hof, den der Wêber ietz buwet, vnd den hof, den Rupp ietz buwet, die dry hof mit allen iren rehten gewonhaiten vnd zu gehorden, vnd wan wir mit guter kuntschaft erfûnden, daz du guter, du er von vns vnd vnserm vorbenempten gotzhus an der erren lut vnd guter stat ze lehen machen wolt, vast besser vnd furtrêffenden wârent denn du erren guter, du vor von vns ze lehen giengent, dar vmb erhortent ôch wir des egenanten her Berhtoltz vom Stain ritters ernstlich bêtt vnd nâment daz von im vff vnd verluhent im ôch do vff dem stuk nach lehens reht du vorbenempten guter ze Têppenhusen gelegen mit allen iren rehten vnd zu gehorden, vnd habent ôch fur vns vnd fur all vnser nachkomenden vnd fur vnser vorbenemptz gotzhus ze sant Gallen mit wolbedâhtem sinne vnd mut vnd mit vnsers conuentz rât vnd haissent vnd ôch mit allen den dingen, als es nach reht vnd nach gewonhait wol kraft vnd maht hât haben sol vnd mag ietz vnd hie nach an allen stetten vnd vor allen luten vnd gerihten gaistlichen vnd weltlichen, den obgenanten dem probst vnd dem conuent gemainlich des gotzhus ze Marhtal vnd allen iren nachkomenden vnd ôch irem vorbenempten gotzhus ze Marhtal daz vorbenempt holtz den Zwikenbuhel vnd ôch du obgesch(riben) guter allu ze Rutlingen dem dorf gelegen mit allen iren rehten gewonhaiten vnd zu gehorden an luten vnd an guten geaigent vnd aigen in sy ôch also mit kraft diss briefs, vnd verzihen vns vnser nachkomenden vnd vnser vorbenempts gotzhus ôch also da mit kraft diss briefs aller lehenschaft aller aigenschaft aller reht vnd ansprâch, so wir dar zu iendert habent vnd ymmer mer hie nach dar zu gehân mugent in dehain wise gen inen gemainlich oder besunder vnd gen ieman anderm sus oder so an all geuard. Vnd was ôch furo ymmer mer hie nach iemant gaistlicher oder weltlicher gen inen da wider utzit an vieng oder tatt, so sullent sy dar an allweg reht haben vnd der selb wider sy vnreht an all geuard. Vnd ze ainem wâren vrkund aller vorgesch(riben) ding so haben wir der obgenant Chun abt des gotzhus ze sant Gallen vnd der convent fur vns vnser nachkomenden vnd fur vnser vorbenempts gotzhus vnser aigen abty vnd capitel insigel insigel^b) gehenkt an disen brief. Der geben ist an sant Angnesen tag in dem jâr, do man zalt von Crists geburt druzehen hundert jâr vnd dar nach in dem sechs vnd nuntzigostem jâr.