Vicarius reverendi in Christo patris et domini domini Burkardi dei gracia episcopi Constanciensis¹ in spiritualibus L generalis dilecto in Christo decano decanatus in Wil² Constanciensis dyocesis salutem in domino. Discretum L Johannem dictum Schaffhuser presbiterum nobis per venerabilem in Christo fratrem Vlricum de Tettingen L commendatorem domus Johannitarum in Tobel³ dicte dyocesis ad vicariam perpetuam parrochialis ecclesie in Wuppenow⁴ ipsius dyocesis ipsi domui in Tobel unite et pertinentis ad presens ex morte quondam Johannis dicti Amman presbiteri ultimi sui vicarii vacantem litteratorie presentatum, de cura animarum et perpetua vicaria dicte parrochialis ecclesie in Wuppenow investivimus et auctoritate ordinaria investimus per presentes sine tamen preiudicio iuris alieni et sub protestatione, quod salvum sit ius dicto domino nostro episcopo suisque successoribus et ecclesie Constanciensi super solucione primorum fructuum ipsius ecclesie in Wuppenow ipsi domino nostro episcopo iure seu antiqua et legitime prescripta consuetudine debitorum. Instituentes eum perpetuum in ipsa ecclesia vicarium sub antiqua et consueta prebenda sibi annis singulis de proventibus ipsius ecclesie sine diminucione qualibet ministranda, mandantes tibi decano supradicto, quatenus ipsum Johannem presbiterum in possessionem vicarie ipsius ecclesie iurium et pertinenciarum eiusdem ducas corporalem, faciens illius subditos eidem in spiritualibus reverenciam et obedienciam debitas exhibere, ipsumque recipias et a tuis confratribus recipi facias in confratrem. Datum Constancie anno domini millesimo trecentesimo nonagesimo sexto, VIII kalendas marcii, indictione quarta.