Ich^a) graff Ott von Tierstein lantrichter in Thurgew¹ thun kunt mit disem brief, dz ich vff dem lantag by Winterthur² an L dem nechsten zinstag vor dem balmtag offenlich ze gericht sass, vnd kam fur mich Amer von Luterberg³ vnd L veriach, dz er recht vnd redlich in eines bestatten koffes wise ze koffenn gegeben hette dem erwirdigen L herren apt Chunen des gotzhuses ze sant Gallen⁴ dis nachgeschribnen lute Heinrich den Groblin, Cunraten, Rudolffen, Hansen vnd Jacob Groblin des egenanten Heinrichs Groblis elich sun vnd Margerethen Rudolfs Groblis elich tochter vnd Cunrat Groblis elichu kind, die alle samen von dem jetzgenanten minem herren dem apt vnd dem gotzhus lehen sind, vnd lopte der och war ze sinde fur lehen, alz vorgeschriben stat, also wo der obgenant min herre von sant Gallen vnd die lute vnd ir nachkomen des ze schaden koment, es sy von angriffen von geistlichen oder weltlichen gerichten oder ane gericht oder wie sich dz fugte, do lopte der vorgenant von Luterberg fur sich vnd sin erben, dem obgenanten minem herren dem apt dem gotzhuss den luten vnd ir nachkomen war ze sinde fur lehen vff allen gerichten geistlichen vnd weltlichen, vnd were och, dz sy des ze deheinem schaden kamint, wie sich dz joch fugte, da lopte er sy gentzlich vnd gar ze ledgenne vnd ze losenne von allem dem kosten vnd schaden, dar in sy deheins wegs komen mochten, vnd waz schadens vnd kostens sy by ir eid behabent, den sol er inen gentzlich vsrichten vnd bezaln, vnd verzech sich her vmb aller friheit genaden vnd recht^b) aller herren vnd stetten vnd aller funden ertikeln vnd sachen, so jeman erdenken kan oder mag, nach des kofbriefs⁵ sag, der dar vber geben ist vnd vor mir erzoigt ward. Mit vrkund ditz briefs, der geben ist vff dem vorgenanten lantag mit des lantgerichtz in Thurgew anhangendem insigel versigelt in dem jare, do man zalte von Cristus geburte drutzehenhundert sechs vnd nuntzig jaren.