Ich^a) Hainrich Rainhart burger ze sant Gallen tun kunt vnd vergich offenlich an disem brief allen, die in ansehent oder horent lesen, daz ich mit L wolbedahtem mut willeklich frilich vnd vnbetwungenlich offenlich gesworn han ainen gelerten aide liplich ze got vnd ze den hailigen mit L vf gehabenen vingern, war daz ich dehainer lay zu spruch sachen stoss oder ansprachen vff disen huttigen tag hetti oder nv hinnenhin L iemer gewunni zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz burger ald si werdent noch da selbs burger, wenne vnd alz dik daz beschach vnd wolt ich ie danne darumb rehtes niht enbern, daz ich ie danne darumb rehtes phlegen vnd reht von in nemen sol vnd wil ze sant Gallen in der statt vor irem geriht vnd niendort anderswa won nach der selben statt reht vnd gewonhait, ez war danne, das ich da selbs rehtlos gelassen wurdi vnd das och das da kuntlich wurdi, so ist mir behalten vnd in dem aid vss gelassen, daz ich das reht ie danne, von dem ich rehtlos gelassen bin, anderswa suchen sol vnd mag, da ez danne billich vnd muglich ist, ân alle geuarde. Vnd des alles ze offem warem vrkunde so han ich Hainrich Rainhart da vorgenant min aigen insigel offenlich gehenkt an disen brief. Der geben ist ze sant Gallen an dem nahsten donstag nach sant Gregorien tag in dem jar, do man von Cristus geburt zalt druzehenhundert jar, nunzig jar vnd darnach in dem sechsten jâre.