Wir^a) die nachgenanten Johans Waltis vnd Walther sin êlicher bruder tun kunt vnd veriehent offenlich fur vns vnd fur alle vnser erben mit disem brieue L allen, die in ansehent lesent oder horent lesen, daz vns die erbern wolbeschaidenn Vlrich Spiesser vnd Johans Appaceller phleger der armen veltLsiechen ze sant Gallen an dem Linsibul¹ an der selben armen siechen stat vnd in iro namen reht vnd redlich verlihen hant daz gut gelegen ze L dem Friien dorff², daz man nempt Linsibuler gut vnd ainhalb stosset an Berg³ vnd anderthalb an Gumaswille⁴, stosset ze der dritten siten an Willa⁵ vnd ze der vierden siten an Zwingenstains hub⁶ mit zimmerren mit allen rehten nutzzen vnd gewonhaiten vnd mit allem dem, so darzu ald darin gehort, ze ainem rehten staten erbzinslehen vmb ainen staten zins, also mit der beschaidenhait vnd in dem rehten dinge vnd gedinge, daz wir vnd vnser erben, ob wir enwarint, frowen alz man tohtren alz knaben das selb vorgeschriben gut mit allen rehten vnd zugehorden in eran vnd vnwustklich haben niessen besetzzen vnd entsetzzen sont, vnd sullent wir vnd vnser erben, ob wir ensint, den selben egenanten phlegern vnd maistern der armen siechen oder iren nachkomen, welhe ie dann da selbs phleger vnd maister sint, zu der selben armen siechen handen von dem selben egenanten gut hinnenhin aller jarlich ie vff sant Gallen tag vier malter baider korn zwai malter vesan vnd zwai malter haber gutes vnd vngefarliches kornes sant Galler messes vnd vier herbst hunr ze rehtem jarlichem zins gantzlich vnd gar geben rihten vnd och antwurten gen sant Gallen an daz Linsibul ân furzug ân alle minrung vnd ân allen der selben phleger vnd maister der armen siechen vnd ir nachkomen schaden ân alle geuarde. Vnd welhes jares wir ald vnser erben daz niht tatint, so sont vnd mugent die selben phleger vnd maister der armen siechen vnd ir nachkomen, welhe ie dann da selbs phleger vnd maister sint, vnd iro helffer, wer die sint, vns vnd vnser erben ie nach sant Gallen tag, wenne su wend, darumb an griffen phenden noten vnd heften vff dem selben gut oder anderswa an allen vnsern gutern vff dem land vnd in den stetten mit gaistlichen vnd mit weltlichen gerihten vnd ân geriht ân klag vnd ân zorn, wie vnd wa vnd wahin su daz getun mugent ald in fugklich ist, alz vil vnd alz dik vntz si ie des vorgedahten iro zins vnd och des schaden, in den si vnd iro helffer von des selben phendens notens heftens vnd an griffens wegen koment, gantzlich gewert vsgeriht vnd entschadgot werdent, vnd mit namen ist beredt, war daz wir ald vnser erben inen den vorgedahten zins dehaines jâres versassint vnd verzugint alz lang, biz das zwen zins den dritten erloffen hetti, so ist vnd sol danne daz vorgeschriben gut ze dem Friien dorff mit aller zugehorde den vorgedahten phlegern vnd maistern der armen siechen ald iren nachkomen, welhe ie dann da selbs phleger vnd maister sint, zu der selben armen siechen handen gantzlich zinsvellig vnd ledig vnd los sin, vnd sont vnd mugent och danne die selben phleger vnd maister der armen siechen vnd ir nachkomen daz selb vorgeschriben gut mit allen rehten vnd zu gehorden haben niessen verkoffen versetzen besetzzen vnd entsetzzen vnd da mit tun, waz si wend ald in fugklich ist, vnd sullen wir si daran niht sumen noch ieren in kain wise. Ez ist och bedingot, beschach daz wir oder vnser erben dehaines jares von vnseren rehten des vorgeschribenn gutes vnd erblehens gan vnd die verkoffen woltint, das wir danne die selben vnseru reht den vorgedahten phlegern ald iren nachkomen an der selben armen siechen statt des ersten vail bieten vnd vor manglichem ze koffenn geben sullent funf schilling phenning Costentzer munse naher dann ieman andre, ob su si koffen wellent, war aber daz su si dann niht koffen woltint ald mohtint, so mugent wir dannenhin die selben vnseru reht wol ze koffenn geben, wem wir wend, inen vnd allen iren nachkomen an allen iren rehten gantzlich vnschadlich. Beschach och, daz die obgenanten phleger oder ir nachkomen dehainen jares von der obgenanten armen siechen rehten des vorgeschribenn gutes vnd erblehens gan vnd die verkoffen woltint, so ist och bedingot, daz si vns vnd vnseren erben, ob wir ensint, die selben iru reht dez ersten vail bieten vnd vor manglichem ze koffenn geben sont och funf schilling phenning der vorgeschribenen munse naher dann ieman andre, ob wir si koffen wellent, war aber, daz wir si danne niht koffen woltint ald mohtint, so mugent si dannenhin die selben iru reht och wol ze koffenn geben, wem si wend, vns vnd vnseren erben an allen vnseren rehten gantzlich vnschadlich. Vnd des alles ze offem warem vrkunde vnd stater sicherhait aller der vorgeschribenn dinge vnd vergicht so habent wir die vorgenanten Johans Waltis vnd Walther sin bruder erbetten die ersamen Nicolausen Rupreht stat amman ze sant Gallen⁷ vnd Vlrichen ab dem Berg den smit burger ze sant Gallen, daz su baid iru insigel fur vns vnd vnser erben gehenkt hant an disen brief, vnder der selben insigel wir vns willeklich gebunden haben, won wir aigener insigel niht habent, dez och wir die obgenanten Nycolaus Rupreht vnd Vlrich ab dem Berg offenlich veriehent an disem brief, vns vnd allen vnseren erben vnschadlich. Dirre brief ist geben ze sant Gallen an dem hailigen abent ze ostran in dem jâr, do man von Cristus geburt zalt druzehenhundert jar, nunzig jar vnd darnach in dem sechsten jâre.