Wir^a) Eberhart vnd Albreht von Burglon gebruder baid ritter tun kunt vnd veriehent offenlich fur vns fur alle vnser erben vnd nachkomen L mit disem brief allen, die in ansehent lesent oder horent lesen, das wir mit ainhellem willen mit wolbedahtem mut vnd mit guter vorbetrahtung L den zehenden gelegen ze Nidern vnd ze Obern Goldach, der wilunt des Hettlingers vnd siner frowen gewesen ist, der vnser reht aigen waz, mit L allen rehten nutzzen vnd gewonhaiten vnd mit allem dem, so von reht ald von gewonhait darzu ald darin gehort, es sie genemptz oder vngenemptz gesuchtz oder vngesuchtz wissentz oder vnwissentz, alz wir den selben zehenden ze Nidern vnd ze Obern Goldach vntz her vff disen huttigen tag, alz dirre brief ist geben, inne gehebt vnd genossen habent, vnd besunder mit vsbenempten worten den zehenden von dem vnd ab dem gut gelegen ze Obern Goldach, das zu disen ziten Hainrich Spatz buwet vnd wilunt Wildrichs gewesen ist, fur ledig los vnd vnansprachig aller mangliches redlich vnd reht aines staten iemerwerenden ewigen koffes verkoft vnd ze koffenn geben habent den erbern wolbeschaidnen Vlrichen Rudger, Johansen Eberlin vnd Cunrat dem Kochler phleger vnd maister des hailigen gaistes des spittals ze sant Gallen¹ allen driien gemainlich vnd vnverschaidenlich vnd iren nachkomen zu des obgenanten spittals handen vmb hundert phunt vnd vmb aht vnd zwainzig phunt phenning guter Costentzer munse, dero wir gantzlich vnd gar von inen gewert sient vnd enphangen habent vnd in vnsern offenn nutz komen vnd bekert sint, den selben vorgedahten zehenden ze Nidern vnd ze Obern Goldach vnd ab des Spatzzen gut mit allen rehten vnd zugehorden wir den obgenanten phlegern vnd maistern des egenanten spittals vnd zu des selben spittals handen reht vnd redlich vf geben geuertgot vnd braht haben fur reht aigen, als reht sitt vnd gewonlich was vnd alz es kraft vnd maht sol vnd mag han ietz vnd och hie nach. Vnd darumb so haben wir vns willeklich verzigen vnd verzihent vns mit disem brief gantzlich vnd gar fur vns vnd fur alle vnser erben des vorgeschribenn zehenden ze Nidern vnd ze Obern Goldach vnd ab des Spatzzen gut mit aller zugehorde aller aigenschaft aller manschaft aller lehenschaft aller kuntschaft alles vszugs aller gewer lut vnd brief alles gaistlichen weltlichen vnd kayserlichen rehtes aller vordrung vnd ansprachen aller reht vnd rehtung, so wir oder vnser erben, ob wir enwarint, an dem zu dem vnd von des vorgeschribenen zehenden wegen ie gehebt habent ald hie nach iemer gehaben oder gewinnen mohtint, vnd das wir noch vnser erben noch nieman andre an vnser stat noch von vnsern wegen die obgenanten phleger vnd maister des egenanten spittals noch iro nachkomen noch den egenanten spittal ze sant Gallen darumb niemer sullent noch wellent an sprechen vf triben bekumberren bekrenken noch in kain wis beswaren weder mit gaistlichem noch mit weltlichem geriht noch ân geriht noch mit enkainer lay ander sache ân alle geuarde. Wir habent och baid willeklich gelobt ietwedre besunder mit siner truwe vnd lobent mit disem brief fur vns vnd fur alle vnser erben, des vorgeschribenen zehenden mit allen rehten vnd zugehorden vnd des koffes fur reht aigen fur ledig fur los vnd fur vnansprachig reht wer ze sinne nach des landes vnd nach aigens reht vnd och die obgenanten phleger vnd maister des egenanten spittals vnd iro nachkomen vnd och den selben spittal ze sant Gallen darumb ze versprechenn vnd ze verstanne an allen stetten an allen gerihten gen aller manglichem ân allen iren schaden, wenn wa vnd wie dik su des bedurffent ald darumb von ieman angesprochen geschadgot oder vf getriben werdent mit dem rehten. Tatint wir oder vnser erben das niht, so hant die obgenanten phleger vnd maister des vorgenanten spittals vnd iro nachkomen vnd der selb spittal ze sant Gallen vnd iro helffer, wer die sint, friies vrlob volkomen reht vnd gewalt, ie darnach, wenne su wellent, vns vnd vnser erben, ob wir ensint, ze phendenn ze notenn ze heftenn vnd an ze griffenn an vnsern luten vnd gutern vff dem land in dorffern vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su das getun mugent ald in fugklich ist, als vil alz dik vnd och alz lang, vntz in ie der vorgeschriben zehend entschlagen vnd entledgot wirt vnd in der schad, in den su da von koment ald enpfahent, vnd och der schad, in den su vnd iro helffer von des selben phendens notens heftens vnd an griffens wegen koment, gantzlich vnd gar vsgeriht gewert vnd entschadgot werdent, vnd sol vns noch vnser erben noch dehain vnser lut noch guter hie vor noch hie wider niht friden friien schirmen noch gut sin kain geriht gaistlichs noch weltlichs kain frihait kain gewonhait kain burgerreht kain buntnust kain lantfrid kain geselleschaft kain âcht noch ban kain fund noch gesetzt, so ietz ist ald hie nach iemer funden gesetzt oder erdaht wurd, enkain reht des landes noch der stett noch enkainer lay ander sach behelff noch furzug, so ieman vinden oder erdenken kan in dehain wise. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so habent wir die vorgenanten Eberhart vnd Albreht von Burglon gebruder ritter baid fur vns fur alle vnser erben vnd nachkomen vnseru insigel offenlich gehenkt an disen brief. Der geben ist ze Byschoffzelle² an dem nahsten mantag vor sant Georien tag in dem jar, do man von Cristus geburt zalt druzehenhundert jar, nunzig jar vnd darnach in dem sechsten jâre.