Allen^a) den, die disen brief an sechent oder horrent lesen, kund ich Cunrat Bader burger ze Rapreschwil¹ vnd vergich offenlich mit disem L brief, als mir min schwager Rudi, Heini vnd Hans die Schuchter gebruder vor ziten versetzt hant etwa vil zins vnd jarlichs L geltz in den hoffen ze Ermerschwil² vnd ze Lutispach³, die selben zins vnd jarlich gelt mir och nu verstanden sint nach der hoptbrief L lut vnd sag, so ich dar vmb inne han, das ich da fur mich vnd min erben den selben minen schwagren vnd iren erben die gnad vnd fruntschaft getan han, das si in den nachsten sechs jaren nach ein anderen nach dem tag, als diser brief geben ist, den vorgeschribnen hoff ze Ermerschwil mit aller zu gehord wol ledig machen vnd die vorgenanten zins vnd jarlich gelt, so dar vff stat, ablosen mugent mit hundert guldin vnd mit dry vnd fiertzig guldin guter vnd gaber an gold vnd an gewicht, wenn vnd weles jars si went in dem zil vor sant Johans tag ze sungichten an den zins, so des jars gefallen sol vnd nach sant Johans tag mit dem selben zins an geuerd. Dar nach veriechent wir die vorgenanten Rudi, Heini vnd Hans Schuchter, war das wir oder vnser erben die ablosunge in den vorbenempten sechs jaren nit tatind, das denn der vorgenant hoff ze Ermerschwil mit aller zu gehord, es sig hus hoffstat akker wisen holtz veld, wie das alles namen hat, dem vorgenanten Cunrat Bader oder sinen erben gentzlich sol verfallen sin ze rechtem eigen, also das si den selben hoff dannenhin besetzen vnd entsetzen haben vnd niessen sond als ir eigen gut vngesumpt vnd vmbekumbert von vns vnd vnsren erben vnd von menlich von vnser wegen an geverd, won wir vns furbas vnd dar nach aller vordrung vnd ansprach dar an enzigen haben vnd enzichen vns fur vns vnd vnser erben mit vrkund dis briefs. Vnd des alles ze warem vrkund han ich der vorgenant Cunrat Bader min eigen insigel offenlich gehenkt an disen brief. So habent wir die obgenanten Rudi, Heini vnd Hans Schuchter erbetten den bescheiden Cunrat Bollinger amptman vnser genadigen herschaft von Toggenburg, das er sin insigel im vnd sinen erben vnd och der selben vnser herschaft von Toggenburg ir rechten vnschadlich fur vns gehenkt hat an disen brief. Der geben ist an dem nachsten zistag nach des heiligen crutz tag ze meijen, do man zalt von Cristus geburt drutzechen hundert vnd nuntzig jar, dar nach in dem sechsten jar.