Wir Wenczlaw von gottes gnaden Romischer kunig zu allen zeiten merer des reichs vnd kunig zu Beheim enbietten den burgermeistern reten vnd burgern gemeinlichen der stette Costentz, Vberlingen¹, Lyndow², sant Gallen, Wangen³ vnd Buchorn⁴ vnsern vnd des reichs liben getrewen vnser gnade vnd alles gut. Liben getrewen, als die burgermeister vnd burger gemeinlichen der statt zu Rauenspurg⁵ von vns vnd anndern vnsern vorfaren an dem reiche mit dem obristen forstampt vber vnsern vnd des reichs walde, den man nennet den Aldorfferwalde⁶ begnadet sint, den zubereiten vnd vor vngehow zubesorgen vnd sunder von den zuhuten, die in den selben walde nicht belehent sind vnd von alders darynne nicht hawen sollen noch der briue sage, die in daruber gegeben sind, ist vns von in furkomen, wie das von den von Walsse⁷ vnd ouch andern vberfaren vnd nicht gehalten werde vber die kuntschafftbriue, die vor zeitten daruber verhort vnd gegeben sind worden. Douon ist vnsere meynung vnd heissen vnd gebietten euch ernstlichen vnd vesticlichen bey vnsern vnd des reichs hulden, das ir die obgenanten vnsere vnd des reichs burgere vnd statt zu Rauenspurg bey der obgenanten kuntschafft vnd bey allen iren briuen vnd rechten, die sie vber den Altdorfferwald haben, wider die egenanten von Walsse vnd die anndern, die in dorein greiffen, getrewlichen hanthaben schutzen vnd schirmen sollet, das sie dobey noch irer briue lautte vnd sage, die sie doruber redlichen herbracht haben, gerulichen beleiben, als libe euch sie, vnsere vnd des reichs swere vngnad zuuermeyden. Geben zum Karlstein⁸ an dem heiligen pfingestabende vnser reiche des Beheimschen in dem XXXIII vnd des Romischen in dem XX jaren. Vnd stund vnden vff dem spacium desselben brieffs Ad relationem domini Beneschii de Chussnik⁹ Franciscus prepositus Northusensis¹⁰.¹Überlingen BW. ²Lindau, bayer. Schwaben. ³Wangen i.Allgäu. ⁴Buchhorn, ht. Friedrichshafen BW. ⁵Ravensburg BW. ⁶Altdorferwald, nö. Ravensburg. ⁷Waldsee, nö. Ravensburg. ⁸Karlstein, sw. Prag. ⁹Benesˇh v. Choustnik (Böhmen), 1382–1404 Relator. ¹⁰Nordhausen, Thüringen.