Ich^a) Hans der Hurtzel von Kremprât¹ vergich vnd tun kund allermanglich mit disem offenn brief fur mich vnd all min erben, das ich von dem erwirdigen L gaistlichen herren hern Burkarten abt zu Pfauers² minem gnadigen herren mir vnd minen lybsêrben ze rechtem zinslehen emphangen hab den widem der L kilchen ze Kemprâten mit aller zugehorung vnd rechtung mit samlichen bedingten stukken vnd artikeln, als hiernachgeschriben stât. Des ersten, L das ich ald min lybserben, in dero hand vnd gewalt der selb widem nv hinnenthin yemer kumpt, dem obgenanten minem gnadigen herren dem abt zu Pfauers sinem gotzhus vnd nachkomen iarlich vnd yegklichs jârs besunder ye vff sant Martins tag ze rechtem zins dauon richten vnd geben sollint siben mutt gutz vngeuarlichs kernen Rapreswyler³ messes vnd darzu ainem vogt zu Rapreswyl, wer der ye zu zyten ist, zwolf schilling pfenning Zurcher munss oder dafur ain mayenswyn ze vogtstur, als dann gewonlich ist, ân geuerd. Wann ouch ich nv schierest mit dem tod abgegangen vnd von dirr welt geschaiden bin, das got lang wend, welh dann miner libserben zu demselben minem gnadigen herren dem abt ald zu sinen nachkomen zu Pfauers kompt vnd denselben widem ze lehen emphahen wil, als dik vnd als offt das ze schulden kumpt, der selb sol daz eruordern mit zwain pfunden gutz vngeuarlichs pfeffers, vnd welher daz also eruordert vnd im bitte ze verlyhen, dem sol ouch der selb min herr von Pfauers vnd sin nachkomen den selben widem ân verziehen lyhen vnd verlyhen mit allen hieuor vnd hienach geschribnen stuken vnd artikeln, als er mir yetz zemal verlyhen ist, an all geuard. Als ich ouch von dem obgedachten widem ain tail verkoufft versetzt vnd verendert hab, ist namlich beredet, das ich oder min lybserben die selben verkouffti versetzti vnd verenderti stukk allu sament gar vnd gantzlich mit allen eren rechten gewonhaiten vnd zugehorden herwiderumb zu demselben widem kouffen losen vnd bringen sond, also das der widem gantzlich zesamen kem vnd gebrâcht werd, als er vormaln gewesen vnd die vorgedacht kilch zu Kempraten damit gewidemt vnd gestifft ist, vnd sollint ouch das tun vnd vollfuren inwendig jâres frist nach dat ditz briefs ze rayten ân all sûmung irrung vnd widerred ân all geuard. Ich noch min lybserben noch nieman anders von vnsern wegen ensollint ouch enkainen tail noch stukk von demselben widem furbas nit verendern versetzen noch verkouffen vnd ensollint ouch den widem noch enkain stukk des widems von enandern nit taillen noch sundern, wan das der widem nv hinnenthin eweklich vnd allzit by sament vnzertailt belyben sol ân all ander andrung vnd zertaylung. Taten aber wir des nit vnd daz ich ald min lybserben der yetzgedachten stukk ains oder mer uberfurint vnd nit vollfurtint, als yetz hieuor beschaiden ist, so sol der selb widem mit aller siner zugehorung vnd rechtung dem obgenanten minem gnadigen herren dem abt sinem gotzhus vnd nachkomen zu Pfauers von mir vnd allen minen lybserben dannenhin ledklich geuallen vnd verfallen sin, vnd sond ouch wir noch nieman anders von vnsern wegen furbas mer enkain vordrung ansprach noch rechtung darzu noch daran gewinnen noch gehaben, vnd sond ouch ich ald min lybserben, die sich selb daran ubersahint, vnser gnadigen herrschafft von Osterrich ze pen darumb veruallen vnd gebunden sin ze geben funfzig pfund pfenning der obgedachten munss. Des vnd aller vorgeschribner ding ze warem offem vrkund stater vester sicherhait nv vnd hienach, wan ich dann aigen insigel nit han, so hab ich ernstlich gebetten den frommen vesten ritter hern Hanmann von Rynach⁴ vogt zu Rapreswyl, daz er sin insigel fur mich vnd all min lybserben offenlich gehenkt hât an disen brief im selb vnd sinen erben ân schaden, darunder ich vns vestlich verbunden hab vnd bind stat ze halten alles, daz vor von vns geschriben stât, by guten truwen ân all geuard. Dis geschâch vnd ward dirr brief geben ze Rapreswyl an mitwochen nach sant Bonifacien tag in dem brachot nach Crists geburt druzehen hundert vnd nuntzig jar, darnach in dem sechsten jâre.