Den frommen wysen luten Vlrichen Rudger, Cunraten Kochler vnd Johansen Eberlin L burgern vnd maistern des spittals ze sant Gallen¹ enbietent wir Haintz im Loh vnd^a) L Walti Varser baid burger ze Veltkilch² vnser willig dienst vor. Lieben herren, als wir baid L vnd ôch vnser frund Cuntz im Loh, der ietz selber zu vch vnder ôgen kunt, ain gut von dem obgedachten spittal ze lehen geheppt habint, das zwuschent Montigel³ vnd Aichenwis⁴ gelegen ist, als das der gegenwurtig koffbrief, der vch mit disem brief gezaigt vnd furbracht wirt, wol kuntlicher vnd aigenlicher vrkundet vnd wyset, tund wir vwer wyshait ze wissent, das wir das selb gut dem erbern knecht Stephan Graber vnd sinen geschwustergiden ietz gantzlich ze koffent geben habint, vnd won wir nv ietz selber nit zu vch komen mugent, das wir das gut vffgebint, als wir billich tun soltent, davon so schikkent wir vch es vff mit disem offenn brief an vwer aller hand vnd bittent vch och daby ernstlich, das ir es dem vorgenanten Stephann Graber vnd sinen geschwustergiden nv hinnenhin verlihint vnd inen ôch irn vorgedâchten kôffbrief nach iro notdurfft darvmb fertigint vnd besigelint, won das vnser guter will ist. Mit vrkunde dis offenn briefs, den wir vch hiervmb versigelten schikkint vnd ôch ernstlich gebetten habint besigeln fur vns vnd all vnser erben mit Albrechtz⁵ des stattschribers insigel ze Veltkilch, doch im selb vnd sinen erben vnschadlich. Geben an sant Johans abend des Toffers ze sunwenden anno domini M^oCCC^moLXXXX^mo sexto.