Wir^a) diz nâchgenempten Johans Venr richter ze Ragatz³ vnd Walther Kobler Rudolfs Koblers saligen ab Ruti⁴ êlicher sûn tugint kûnt vnd veriehent L offenlich mit disem brieue fur vns vnser nâchkomen vnd fur alle vnser êrben allen, die in sehent lesent oder horent lesen, daz wir baid mit wolLbedâchtem mute vnd mit guter vorbetrachtung von vnser rechter note wegen recht vnd rêdlich verkofft habent vierzehen mann meder, der L selben meder sint zwelf mader gelegen in der vnd vff der wisen, die man nemmet Speroltz wise⁵, stosset ainhalb an Phaffen Êsch⁶ vnd andert an Becher Gassen⁵, vnd die andern zwai mêder, die man nemmet Roten Lachen⁷, stossent ainhalb an amman Bisins guter vnd andert an Vrer mad⁵, vnd allu vnsru recht, die wir baid ald dewedre besûnder vnder vns an den vnd in den selben ietzgedâchten medern vntzher ie gehebt hant, waz daz ist ald wie su genempt sint, alles mit grund mit grât mit wasen mit zwi mit stegen mit wegen mit wasser mit wasserflussen mit allen den rechten nutzen vnd gewonhaiten vnd mit allen den zugehorden, so von recht ald von gewonhait dâr zu vnd dâr in gehorent vnd vntzher gehort hant, vnd aines staten êwigen koffes rêdlich vnd recht ze koffen geben habent den wisen wolbeschaidenn Vlrichen Rudger, Johansen Eberlis vnd Johansen Êggrichen phleger vnd maister der siechen dez spittals ze sant Gallen⁸ vnd dem selben spittal vnd sinen phlegern, wer die sint, zu dez selben spittals handen vnd gewalt vmb sechzehen phûnt phenning ie zwen gut geng haller fur ainen Costenzer phenning, die wir von dez selben spittals phlegern dâr vmb enphangen habent vnd ir gantzlich von inen gewert sint worden vnd an vnsern offen nûtz bewêndet sint, der selben meder sint zwai mann mad min vorgenempten Johansen Venren recht aigen gewesen, so sint die andern zwelf mann meder min obgenanten Walthers Koblers och recht aigen gewesen, vnd hant die och dem selben vorgeschribenn spittal vnd den egenempten sinen phlegern zu dez selben spittals gewalt vnd handen fur recht aigen vfgeben geuêrtigot vnd zu iro handen braht mit allen den worten vnd getaten vnd an den stetten, wie aigener guter recht sitte vnd gewonhait waz vnd ist, daz es nâch dem rechten wol kraft vnd maht sol vnd mag han ietz vnd hie nâch. Vnd dâr vmb so haben wir vns baid vnd ietwedre besûnder von vnsern vnd vss vnsern handen in dez vnd zu dez obgedâchten spittâls vnd siner phleger hend vnd gewalt frylich vnd willeklich entzigen vnd verzihent vns mit disem brieue gantzlich vnd gar fur vns vnd fur alle vnser êrben aller aigenschaft aller lêhenschaft aller kûntschaft aller rechtûng aller manschaft aller gewêr lute vnd brieuen aller recht vordrûngen vnd ansprâchen gaistlichs vnd weltlichs gerichtes, so wir baid ald dewedre besûnder vnder vns ald vnser êrben an den vnd zu den vorgeschribenn gutern vnd medern ald zu dehainen iro zugehorden ie gehebt hant ald hie nâch iemer mêr gehaben oder gewunnen mohtint, vnd daz wir noch vnser êrben noch dewedre vnder vns noch niemant an vnser statt noch von vnsern wegen den vorgeschribenn spittâl noch dehain sin phleger von der vorgedâchten meder noch von dehainer iro zugehorde wegen nû hinnenhin niemer mêr sullent noch wollent ansprechen vftriben bekumberren bekrênken noch in dehain wise beswaren weder mit gaistlichem noch mit weltlichem gerichte noch ân recht noch mit dehainen andern sachen ân gefarde. Wir haben och gelobt bi vnsern truwen vnd lobent mit disem brieue fur vns vnd fur alle vnser êrben, der vorgeschribenn meder mit allen zugehorden recht wer ze sinne nâch landes recht vnd die obgenanten spittâls phleger vnd iro nâchkomen vnd den selben spittal nâch dem rechten ân allen iro schaden dâr vmb ze versprechenn vnd ze verstanne vff allen gerichten gen aller manglichem vnd an allen stetten, wenn wo vnd wie dik su dez nâch dem rechten nodurftig sint, ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd geding so han ich vorgenempter Johans Venr min aigen insigel fur mich vnd min êrben offenlich an disen brief gehênket, vnd ze mêrer sicherhait der selben dinge vnd gedinge so han ich obgenanter Walther Kobler, won ich aigens insigels nut hatt, mich willeklich gebunden vnder dez êrbern wolbeschaidenn Rudolfs Venren insigel vogt ze Frodenberg⁹, der daz selbe sin insigel von miner ernstlicher bette wegen fur mich vnd min êrben offenlich an disen brief gehênket hât, dez och^b) ietzgenempter vogt Rudolf Venr vergich mir vnd minen êrben gantzlich vnschadlich. Diz beschach vnd wart dirre brief geben ze Frodenberg in dem jâre, do von Cristi geburt wârent druzehenhûndert vnd nunzig jâr vnd dâr nâch in dem sechsten jâr, an dem nahsten mantag nâch sant Vlrichs tag.