Ich^a) Cunr. Stosser ain fry lantrihter in der Piers¹ von minez gnadigen herren dez L Romschen kung Wentzlaus gwalt vnd von dez durchluhtigen hochgeboren L fursten vnd herren herren Stefan von gotz gnaden phallentzgraf bi Rin L hertzog in Paigern² lantuogt ze Swauben tun kunt mit disem brief, das die wisen wolbeschaiden burgermaister rat die burger gemainlich der stett Kostentz, Vberlingen³, Rauenspurg⁴, Lindow⁵, sant Gallen, Wangen⁶, Buchorn⁷ ir klag vf disem geriht alz verr mit dem rehten volfurt hand vff Purkart Nagel genant Schell, daz man in solt han verkunt in die aht vnd vss dem frid in den vnfrid, dez gaben si im ain frist vnd vff schub von erber lut bett wegen, doch vnschadlich iren rehten, also wenn si dez nit lenger enberen noh geraten weltin vnd die vorgenanten stett oder ir bottschaft an ir statt von der selben klag wegen gemainlich oder besunder mich ald wer denn rihter ist manot mit disem brief, es si mit geriht an geriht ald an welen stetten dz war, so sol man in an alz verziehen den vorgenanten Purkart Nagel kunden in die aht vnd vss dem frid in den vnfrid, vnd wa dz also geschiht, so sol es doch kraft vnd maht han in aller der wis vnd rehten, als ob es vf disen hutigen lantag geschehen war, vnd da nah gescheh waz reht si. Des ze vrkund henk ich des gerihtz insigel an disen brief. Der geben ist ze Wangen vor lantgeriht mit vrtail vnd mit reht an dem nahsten fritag vor sant Jacobs tag dez meren nah gotz geburt druzehenhundert vnd sehs vnd nunczig jar.