Ich^a) Cunrat von Ainwille¹ burger ze sant Gallen kund vnd vergih offenlich mit disem brief allen vnd ieklichen, die disen brief sehLent oder horent lesen, das ich vnd min erben vnd nachkomen, in dero hand vnd gewalt das maijerampt des portenamptes L vff dem Rodmonten² vnd anderswâ iemer kumt vnd das inne hand vnd niessent bi der offnung vnd sagung, so der hohwirdig L ffurst abt Cun abt dez gotzhus ze sant Gallen³ min genadiger hêrr von des erwirdigen hern Nicolausen von Vtzingen ze den ziten custer vnd portner⁴ des vorgenamten gotzhus ze sant Gallen vnd ouch durch miner ernstlichen betten wegen von rehten vnd rehtungen des vorgeschribnen maijeramtes geoffnot vnd geseit hât, als der brief, den der vorgenant herr Nicolaus von Vtzingen vnder desselben abt Cunen anhangenden insigel vmb dieselben offnung vnd sagung inne hât, bewiset vnd seit, beliben vnd bestân sollent vnd wider denselben brief noch wider dehain sin articul niemer reden noch tun noch schaffen geredt ald getân ân alle geuard. Item ich vergih ouch offenlich an disem brief, als ich Johansen Wattler ab Braitenuelt⁵, der ain aigen man ist vnd zu dem vorgenamten sant Gallen gotzhus nit gehoret, das gutli, daz man nemmet Gaisshus⁶, gelegen bi Braitenuelt, das in das vorgenant maijeramt gehoret, ze erblehen gelâssen vnd geluhen han, wenne da derselb Johans Wattler ald wer der ist, in des hand vnd gewalt dasselbe gutli Gaisshus von sinen vnd siner erben vnd nachkomen handen nv hinnenhin iemer me kumt vnd ist vnd dz inne hât, ab gât vnd enist von todes wegen, so sollent ich vnd min erben vnd nachkomen, in dero hand vnd gewalt das vorgeschriben maijeramt iemer me kumt vnd ist vnd das niessent, dem vorgenamten hern Nicolausen von Vtzingen vnd allen sinen nachkomen von demselben Johansen Wattler, ob er enist vnd dasselbe gutli Gaisshus vntz in sin tôtbett inne gehept vnd genossen hât, vnd ouch von ieklichem, der vor ald nach im enist vnd abgât von todes wegen vnd dz selbe gutli Gaisshus vntz in sin totbett von dem egenamten Johansen Wattler vnd von sinen erben ald nachkomen inne gehept vnd genossen hât, den man durch reht vallen sol, ze rehtem hoptval nach tôd geben vnd rihten sollent dru pfund guter vnd genger haller oder anderlay guter genger vngeforlicher munsse dero wert da fur, ân alle geuard, als dik vnd es ze schulden kumt. Item welher zît oder welhes tages ouch ich vnd min erben ald nachkomen, in dero hand vnd gewalt das vorgenamt maijeramt iemer kumt vnd ist, das vorgenamt gutli Gaisshus vsser des egeschribnen Johansen Wattlers vnd vsser siner erben ald nachkomen handen vnd gewalt bringen vnd gewunnen mugent vnd das mit sant Gallen gotzhus luten besetzen, so sigin wir demselben hern Nicolausen von Vtzingen noch dehainen sinen nachkomen von desselben valgebens wegen nihts mêr gebunden noch haft ân alle geuard, als ich des alles mit tadingen lieplich vnd tugentlich mit demselben hern Nicolausen von Vtzingen in ain komen geainbart vnd gehult bin. Des ze offem warem vrkund vnd gantzer sicherhait aller vorgeschribner ding henk ich obgenamter Cunrat von Ainwille min aigen insigel fur mich vnd fur alle min erben vnd nachkomen offenlich an disen brief. Ich Johans von Ainwille⁷ ouch burger ze sant Gallen vergih ain gantz warhait aller der ding, so Cunrat von Ainwille da vorgenamt min elicher vatter veriehen hât an disem brief, vnd ze merer sicherhait derselben ding henk ich och min aigen insigel fur mich vnd min erben vnd nachkomen offenlich an disen brief. Der geben ist ze sant Gallen an dem nahsten mantag nach sant Michahels tag des hailigen ertzengels des jares, do man zalt von gottes geburt tusent druhundert nuntzig vnd sehs jare. Da bi wâren Johans von Bussnang bropst vnd camrer⁸, Hainrich von Gundelffingen werchdegan⁹, Georius von Enne¹⁰ conuentuâl des vorgeschriben gotzhus ze sant Gallen, Kaspar Voli hofamman¹¹, Johans Hor ze der zîten alter burgermaister, Nicolaus Rupreht stattamman¹², Bilgri Gmunder, Lienhart Payer, Cunrat ab der Hub¹³ genamt Johler, Cunrat Kuchimaister, Cunrat Vogelwaider, Cun­rat von Watt¹⁴, Vlrich Keller von Berg¹⁵, Vlrich Ortwin, Johans Widmer burger ze sant Gallen vnd ander erber lute gnug.