Ich^a) graf Hans von Werdenberg von Sanegans¹ vnd wir dis nachbenempten sin sun graf Rudolff, graf Hans, graf Hug vnd graf Hainrich² all vier gebruder bekennen vnd tun kund offenlich mit dem brief, das wir L vnd all vnser erben dem hochgebornen fursten vnserm genadigen herren hertzog Lupolten hertzogen zu Osterrich³ zu Styr zu Kernden vnd zu Krayn grafen zu Tyrol etc. sinen prudern vnd vettern vnd allen L iren erben, ob sy nit warint, recht vnd redlich schuldig sint vnd gelten sollint druzehen tusent pfund guter gaber vnd genamer haller, die vns derselb vnser gnadiger herr hertzog Lupolt von vnser ernstlichen bett wegen L als bar gelihen vnd in vnsern gewalt nutzlich geantwurt hat, damit wir vnsern grossen taglich wachsenden schaden verkomen vnd gewendt haben. Vnd darumb haben wir obgenanten grafen von Werdenberg von Sanegans allesament mit guter vnd wolbedachter vorbetrachtung zu den zyten vnd tagen, do wir es fur vns vnd all vnser erben mit recht wol kreffteklich getun mochten, den obgenanten vnsern gnadigen herren von Osterrich vnd allen iren erben vnd nachkomen vmb dieselben druzehen tusent pfund haller ze ainem rechten redlichen werenden pfand yngesetzt vnd versetzt vnd in ir hand vnd gewalt redlich gebrâcht vnd geantwurt nach pfandschafft recht vngeuerlich vnser aigen veste vnd statt Sanegans⁴ vnd vnser grafschafft vnd hêrrschafft, so darzu gehorent, mit luten mit gutern mit gnossamen mit vogtyen gerichten twingen vnd bannen mit sturen zinsen vallen zuuallen vnd gelassen mit aller aigenschafft pfandschafft vnd lehenschafft gaystlicher vnd weltlicher lehen mit bergrechten isenwerk vnd smitten mit dem buwhof zu Sangans vnd sunderlich mit allen luten, so in dieselben graffschafft vnd gnossami gehorent, wa ald an welhen stetten die gesessen ald wonhafft sint, vnd ouch mit allen gutern dorffern hofen alpen vischentzen wiltbannen akkern wisan holtz veld wunn vnd wayd vnd namlich mit aller gewaltsami ehafften gewonhaiten eren rechten vnd zugehorden benempten vnd vnbenempten^b), vnd ouch darzu vnser aigen wingarten vnd guter zu Malans⁵ mit allen iren rechten nutzen vnd fruchten, als wir das alles vntzher inngehebt besessen vnd genossen haben, also das die obgenanten vnser gnadigen herren von Osterrich ir erben vnd nachkomen dieselben vnser veste vnd statt Sanegans die graffschafft vnd herschafft lut vnd guter mit aller zugehorung vnd rechtung, als vor ist beschaiden, in ains werenden pfands wys innhaben niessen besetzen vnd entzetzen sond vnd mugent als ander ir herschafften land lut vnd guter ân alles abslahen vnd abniessen der nutz, als lang vnd alle die wyl wir ald vnser erben von inen ald von iren erben das mit druzehen tusent pfund hallern guter vngeuarlicher haller nit widergelost vnd erledget hand, derselben widerlôsung si vns ouch statt tun vnd gehorsam sin sond, wenn ald welhes iares wir sy des zwuschen wyhennachten vnd sant Johans tag des Touffers zu sunwendi mit druzehen tusent pfund guter haller ald mit souil der munss, die denn ze mâl, so wir die widerlosung tun wellen, ze Veltkilch⁶ in der statt fur haller vngeuarlich geng loffig vnd genam ist, anuordrent vnd ermanent vnd wir sy ouch der vssrichtent vnd bezalen nach lut vnd sag des gegenbriefs, den wir darumb besigelten innhaben. Wir vnd vnser erben sollint ouch der obgenanten vnsrer genadigen herren von Osterrich vnd irer erben vmb dis obgedachten werenden pfandschafft vnd versatzung der obgenanten vnser aigen veste vnd statt Sanegans mit allen wirden nutzen rechten vnd zugehorungen, als vor begriffen ist, vmb namlich vmb allu obgeschribnu ding gut vnd getruw wern vnd gewern sin nach recht, wa vnd gegen wem ald vmb welhu obgeschribnu stuk vnd artikel si des an gaistlichen ald an weltlichen gerichten yemer bedurffent ald notdurfftig werdent, mit guten truwen ân all geuard. Wir obgenanter grâf Hans von Werdenberg von Sangans, graf Rudolf, graf Hans, graf Hug vnd graf Hainrich sin sun haben ouch all funf yegklicher besunder ain gelerten ayd mit vffgehabnen handen lyplich zu got vnd zu den hailgen gesworn, das wir vnd vnser erben die vorgeschribnen vnser gnadigen herren von Osterrich vnd ir erben by der obgenanten vesten vnd statt Sanegans by der grafschafft herrschafft luten vnd gutern vnd by allen rechtungen, als obgeschriben^c) ist, ruwklich vnd fridlich belyben lazzen vnd sy an dekainen irn obgeschribnen rechtungen bedingten stuken vnd artikeln niemer bekumbern sûmen noch irren sollint noch enwellint, alle die wyl wir das von inen nit gantzlich erlost noch gelediget hand in der wys vnd maynung, als vor ist beschaiden, ân alle geuard. Des ze vrkund ainer warhait stater vnd vester sicherhait nv vnd hienâch hât vnser yegklicher sin insigel fur vns vnd all vnser erben offenlich gehenkt an disen brief. Vnd ze merer vnd noch bessrer sicherhait haben wir ernstlich gebetten den hochwirdigen vnsern lieben herren vnd vettern hern Hartmann byschoff ze Chur⁷ vnd den erwirdigen gaistlichen hern Burkarten abt zu Pfauers⁸, das ir ietwedra sin insigel ze ainer war wissenden gezungnuss dirr obgeschribnen sach doch in selb irn gotzhusern erben vnd nachkomen ân schaden zu vnsern insigeln offenlich gehenkt hât an disen brief. Der geben ward an der nachsten mitwochen nach sant Michels tag nach Crists geburt druzehenhundert vnd nuntzig jar, darnach in dem sechsten jar.