Wir^a) Rudolf von gottes verhengnust abt des gotzhus ze sant Johann in Turtal¹ sant Benedicten ordens in Costentzer bystum gelegen tunt L kund allermenglichem mit disem brief, daz wir durch nutz vnd fromen vnsers vnd des ietzgenanten vnsers gotzhus fur vns vnd vnser nachkomen L mit dem erwirdigen herren abt Cureseln des gotzhus ze Rinow² aines rechten vnd redlichen wehsels in ain komen sint, also daz L wir Elsbethen Werderin Rudolfs Werders von Trutlikon³ elichen tohter, die von aigenschaft ires libes vnsers gotzhus ze sant Johann^b) gewesen ist, mit lib vnd gut vnd mit aller zugehord vssgenomen den kinden, die si ietzo hat, die selben kind wir vns vnd vnserm gotzhus behebt haben, geben haben dem obgenanten abt Curesel sinen nachkomen vnd sinem gotzhus ze Rinow vmb Katherinen Laingruberinen Hainrich Laingrubers von Trutlikon elichen tohter Burkart Hofmans von Matzingen⁴ elichen wirtennen mit lib vnd gut vnd mit aller zugehord, die des obgenanten gotzhus ze Rinow aigen gewesen ist. Vnd habent disen wechsel also in namen vnd an statt vnsers gotzhus fur vns vnd vnser nachkomen getan vnd volfurt mit aller ordnung vnd kraft worten vnd werken, so dar zu vnd zu solichen sachen gehorten, alz gewonlich vnd recht ist, an alle geuard. Vnd verzihent vns hier vber in dirre sach fur vns vnd alle vnser nachkomen aller der helfe rechten schirmung gesetzten vnd funden, da mit wir ald vnser nachkomen oder ieman anders von vnser ald vnser nachkomen oder vnsers gotzhus wegen dehain ding getun kond oder moht, dar mit diser vorgeschribner wechsel vernicht oder bekrenkt werden moht in dehainen weg, der ie erdaht wart oder noch funden wurde, alles an geuard. Vnd des ze vrkund vnd ainer staten vesten warhait aller diser vorgeschribnen ding, das die gut kraft vnd macht nu vnd hienach haben sollent, so haben wir obgenanter abt Rudolf vnser insigel fur vns vnd vnser nachkomen offenlich gehenkt an disen brief. Der geben ist ze sant Johans in vnserm vorgenanten gotzhus an dem nahsten zinstag nach sant Martis tag, do man zalt von Cristus geburt druzehenhundert vnd nuntzig, dar nach in dem sehsten jar.